Դատարանն ապացուցեց Նիկոլ Փաշինյանի խոսնակի զրպարտությունը
ՎԵՐԼՈՒԾՈՒԹՅՈՒՆՆԵՐ
«Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանի դեմ Նիկոլ Փաշինյանի արշավը հերթական հարվածը ստացավ։ Նախօրեին ԱԱԾ-ն ստիպված էր արձանագրել, որ ընդդիմադիր գործչի դեմ ապօրինի հետապնդում է իրականացվել, իսկ Վերաքննիչ քաղաքացիական դատարանն էլ արձանագրեց, որ Նիկոլ Փաշինյանի խոսնակը զրպարտություն է կատարել Վանեցյանի դեմ։
Փաշինյանի մամուլի քարտուղար Մանե Գևորգյանը անցած տարվա ապրիլին ֆեյսբուքում գրառում էր արել` իբր Արթուր Վանեցյանը ԶՊՄԿ-ում փայաբաժին ունի։ Ավելին, Արթուր Վանեցյանին կապել էին Միքայել Մինասյանի հետ, նշել, թե լիազորությունների չարաշահմամբ և կեղծ փայատերերի օգնությամբ է նա ձեռք գցել այն փայաբաժինը։ Արթուր Վանեցյանը դատի էր տվել Նիկոլ Փաշինյանին ու նրա խոսնակին, իսկ ընդհանուր իրավասության դատարանի դատավոր Լիլիթ Սարգսյանը արձանագրել էր Փաշինյանի խոսնակի զրպարտության փաստը: Մանե Գևորգյանը վերաքննիչ բողոք էր ներկայացրել, և վերաքննիչ դատարանը՝ դատավոր Մարգարիտա Հարթենյանի նախագահությամբ, կրկին արձանագրել է ՀՀ վարչապետի աթոռը զբաղեցնող անձի խոսնակի զրպարտության փաստը, պարտավորեցրել Մանե Գև որգյանին իր ֆեյսբուքյան էջում հերքել իր իսկ գրառումը։
«Ձախողվեց տարատեսակ «օդում կախված լուրերով» քաղաքական հակառակորդներին անվանարկելու՝ իշխանության ներկայացուցիչների հերթական փորձը»,- արձանագրել են Արթուր Վանեցյանի փաստաբաններ Լուսինե Սահակյանն ու Երվանդ Վարոսյանը։
Ի դեպ, կառավարությունում համառ լուրեր են շրջում, թե գրառման հեղինակն իրականում ոչ թե Մանե Գևորգյանն է, այլ նրա նախկին ղեկավարը։ Ասում են նաև , որ Նիկոլ Փաշինյանը սեր ունի վերցնել իր աշխատակիցների և կուսակիցների գաղտնաբառերը, նրանց ֆեյսբուքյան էջերում գրառումներ անել, իսկ պատասխանատվությունն ու զրպարտչի պիտակը թողնել վերջիններիս վրա։ Ինչևէ, հերթական անգամ փաստվեց գործող իշխանության զրպարտիչ ու բանսարկու լինելու փաստը, այն էլ` ՀՀ դատարանով։
Վաչագան Մաթևոսյան
