Հայաստանը վերջնականապես հանձնվեց Ադրբեջանին և Թուրքիային
ՔԱՂԱՔԱԿԱՆՈՒԹՅՈՒՆ
pravda.ru-ն գրում է, որ ԵՄ-ն ինտեգրվել է հայ-ադրբեջանական հակամարտության ռուսական օրակարգին: Բրյուսելում Արևելյան գործընկերության շրջանակում հանդիպել են Ադրբեջանի և Հայաստանի ղեկավարներ` նախագահ Իլհամ Ալիևը և վարչապետ Նիկոլ Փաշինյանը նախ՝ ԵՄ նախագահ Շառլ Միշելի հետ, ապա՝ տետ-ա-տետ։ Ինչպես ասել է Հայաստանի վարչապետի մամուլի ծառայությունը, երկու երկրների ղեկավարները վերահաստատել են իրենց հանձնառությունը Հայաստանի, Ռուսաստանի և Ադրբեջանի ղեկավարների 2020 թվականի նոյեմբերի 9-ի և նոյեմբերի 26-ի եռակողմ հայտարարությունների կետերի իրականացման հարցում։ Եվրամիությունը խոստացել է նպաստել դրան։ Ադրբեջանն ու Հայաստանը պայմանավորվել են ստեղծել սահմանազատման հատուկ աշխատանքային խումբ, և ԵՄ-ն այդ հարցում կաջակցի փորձագիտական խորհրդատվական խմբով։ Նաև Հայաստանի և Ադրբեջանի ղեկավարները որոշել են սկսել կապերի վերականգնումը։ Իսպանական El Pais թերթին տված հարցազրույցում Իլհամ Ալիևն ասել է, որ Ադրբեջանին հաջողվել է համոզել Հայաստանին բացել երկաթուղին և ավտոճանապարհը Հայաստանի տարածքով դեպի Նախիջևան (Զանգեզուրի միջանցք):
«Նախկինում Հայաստանը դեմ էր մայրուղու բացմանը, բայց մեզ հաջողվեց համոզել, որ դա անխուսափելի է, և նրանք համաձայնեցին»,- ասել է Ալիևը հավելելով, որ քննարկվում է այդ միջանցքների իրավական ռեժիմը։
Հայկական կողմը մինչ այժմ հաստատել է միայն երկաթուղու մասին համաձայնագրերը, որոնք աշխատելու են «փոխադարձ հիմունքներով երկրների ինքնիշխանության ու իրավասության ներքո»։
«Հայաստանը երկաթուղով մուտք կունենա դեպի Իրանի Իսլամական Հանրապետություն և Ռուսաստանի Դաշնություն, մենք պայմանավորվեցինք շարունակել շփումները»,- ֆեյսբուքյան իր էջում գրել է Փաշինյանը։
Ի դեպ, օդային միջանցքն արդեն իսկ գործում է։
«Այժմ «Ադրբեջանական ավիաուղիներ»-ի ինքնաթիռները, որոնք կատարում էին Բաքու-Նախիջևան չվերթը, սկսել են անցնել Հայաստանի օդային տարածքով»,- ասել է Ալիևը։
Նախագահը նաև ասել է, որ Բաքուն ցանկանում է բացել Երեւանի հետ սահմանը, և «մի շարք բանակցություններ են անցկացվել եռակողմ աշխատանքային խմբի շրջանակներում՝ Ադրբեջանի, Հայաստանի և Ռուսաստանի փոխվարչապետների գլխավորությամբ»։ Ալիևն ընդգծել է, որ վիճելի հարցերը պետք է լուծվեն՝ հաշվի առնելով Ադրբեջանի հաղթողի կարգավիճակը։
«Լեռնային Ղարաբաղի տխրահռչակ կարգավիճակի կամ նման այլ բաների հետ կապված քննարկումներին վերադարձ չկա: Մենք ինքներս ենք դա որոշել ուժով և քաղաքական ճանապարհով: ՄԱԿ-ի Անվտանգության խորհրդի բանաձևերի ընդունումից 27 տարի անց մենք միակողմանի իրականացրել ենք դրանք, առկա է նոր իրողություն, որը պետք է հաշվի առնի առաջին հերթին Հայաստանը»,- ասել է նախագահը։
Ալիևը կոչ է արել Հայաստանի կառավարությանը չաջակցել ադրբեջանցիների նկատմամբ ատելություն սերմանելու վրա հիմնված հասարակական կարծիքին և շարունակել հարաբերությունների կարգավորման գործընթացը։ Հասարակական նոր կարծիք պետք է ձևավորվի, ընդգծել է նա։
Ազգային ժողովում «Հայաստան» խմբակցության պատգամավոր Աննա Գրիգորյանը մտահոգություն է հայտնել, որ Ալիևն ու Փաշինյանը Բրյուսելում առանձնազրույց են ունեցել։
«Երկկողմ բանակցությունները կարող են հիմք հանդիսանալ նոր գաղտնի բանավոր համաձայնությունների համար, որոնք կարող են լուրջ խնդիրներ առաջացնել ապագայում», - ասել է նա:
Ինչ վերաբերում է մնացածին, ապա հայկական ԶԼՄ-ների մեկնաբանությունները հոռետեսական են։ Բայց դա այդպես չէ, Հայաստանն էլ ավելի է առաջ գնացել իրավիճակը ապաշրջափակելու հարցում։ Թուրքիայի արտաքին գործերի նախարար Մևլութ Չավուշօղլուն ասել է, որ ԱՄՆ-ում Թուրքիայի նախկին դեսպանը կնշանակվի Հայաստանի հետ հարաբերությունների կարգավորման գործընթացում որպես հատուկ ներկայացուցիչ։
«ԱՄՆ-ում Թուրքիայի նախկին դեսպան Սերդար Քըլըչը կնշանակվի Թուրքիայի հատուկ ներկայացուցիչ Հայաստանի հետ հարաբերությունների կարգավորման գործընթացում»,- TRT-ին ասել է Չավուշօղլուն։ Եթե կա նշանակում, ապա կա նաև Հայաստանի համաձայնությունը բանակցություններին. հայերը հոգնել են կռվելուց և ցանկանում են հարուստ ապրել: Սակայն Մոսկվան պետք է մտածի Հարավային Կովկասում Թուրքիայի աճող դերի մասին։
Նյութը հրապարակման պատրաստեց Կամո Խաչիկյանը
