Փաշինյանի նշանակյալները ձախողում են արդարադատության համակարգը
ՎԵՐԼՈՒԾՈՒԹՅՈՒՆՆԵՐ
Օրենսդիր և գործադիր իշխանությունները զավթելուց հետո Նիկոլ Փաշինյանի ամենակարևոր խնդիրներից մեկը դատական համակարգն իր վերահսկողության տակ վերցնելը դարձավ։ Այդ նպատակով նույնիսկ գործող վարչախումբը ապօրինաբար հեռացրեց Բարձրագույն դատական խորհրդի նախագահ Ռուբեն Վարդազարյանին՝ նրա դեմ քրգործ հարուցելով և խոչընդոտելով նրա աշխատանքը, իսկ ԲԴԽ նախագահի ժամանակավոր պաշտոնակատար նշանակեցին ոչ անհայտ և տխուր համբավ ունեցող Գագիկ Ջհանգիրյանին։ Փաշինյանը նաև փոխարինեց արդարադատության նախարարին։ Ռուստամ Բադասյանին գործուղեց պետեկամուտների կոմիտե, իսկ նախարար նշանակեց նախկին օմբուդսմեն Կարեն Անդրեասյանին, ով հայտնի էր նախկին իշխանությունների հետ անձնական թշնամությամբ։
Այս նշանակումներով Նիկոլ Փաշինյանն ակնկալում էր գործուն քայլերով և մանր-մունր ապօրինություններով լիակատար վերահսկողություն սահմանել դատական համակարգի նկատմամբ, ազատվել անցանկալի և չենթարկվող դատավորներից, ազդել վճիռներ կայացնելու գործընթացի վրա, դատական համակարգը վերածել գործադիր իշխանության կցորդի։ Ըստ ամենայնի, այդ մտահղացումը չիրագործվեց։ Եվ չիրագործվեց բացառապես մեկ պատճառով․ Փաշինյանի նշանակած կադրերի անձնական ամբիցիաների գերդոզավորման, մասնագիտական հմտությունների պակասի, նաև այդ անձանց միջև ծագող հակասությունների պատճառով։ Բացի այդ, նրանցից յուրաքանչյուրը սեփական խաղն է խաղում՝ թքած ունենալով իրենց այդ պաշտոնին նշանակողի հրահանգների վրա:
Օրերս արդարադատության փոխնախարարի պաշտոնից հրաժարական տվեց Սուրեն Գրիգորյանը։ Վերջինս Ռուստամ Բադասյանի մտերիմ ընկերն է, համարվում էր նրա կադրը։ Ըստ մամուլի, Գրիգորյանը պարզապես չի դիմացել Կարեն Անդրեասյանի ամբիցիաներին։ Նախարարության մեր աղբյուրների փոխանցմամբ՝ Անդրեասյանը մինչ օրս աչքի է ընկել միայն նախարարության ղեկավար պաշտոններում իր յուրայիններին նշանակելու, ենթականերից հարգանք պահանջելու, նաև այլ գերատեսչությունների հետ անհարկի բախումներ հրահրելու ունակությամբ։ Իրավիճակը գրեթե նույնական է Բարձրագույն դատական խորհրդում, որտեղ Ջհանգիրյանն իրեն տերուտիրակալ է հռչակել։
Ի վերջո, այդ երկուսի ջրերը, ինչ-որ պահից սկսելու էին նույն առվով չգնալ։ ԲԴԽ նախագահի ԺՊ-ն և արդարադատության նախարարը պարզապես իրար վրա «բոչկա» են գլորում վարչապետի մոտ, ձախողում նախաձեռնությունները, իսկ մեղքը բարդում մյուս կողմի վրա։ Ջհանգիրյանը, ի դեպ, այդ գործում օգտագործում է իր խնամու՝ ԱԺ պատգամավոր և համատեղությամբ իշխանական թիվ մեկ օլիգարխ Խաչատուր Սուքիասյանի կապերը։ Ասում են՝ իրավիճակն արդեն սկսել է զայրացնել վարչապետի պաշտոնը զբաղեցնող Փաշինյանին։ Առաջիկայում կամ Ջհանգիրյանը, կամ Անդրեասյանը անփառունակ կերպով լքելու են իրենց պաշտոնը։ Որևէ մեկի գլխին պետք է կոտրել դատական համակարգը հարամելու մեղքը։
Մենուա Պողոսյան
