Ո՞վ է շեղվել հեղափոխական արժեքներից․ Մարությանի ապտակը Փաշինյանին
ՎԵՐԼՈՒԾՈՒԹՅՈՒՆՆԵՐ
Երևանի ավագանին 44 կողմ և 10 դեմ ձայներով անվստահություն հայտնեց քաղաքապետ Հայկ Մարությանին ու միանգամից մայրաքաղաքի նոր ղեկավար ընտրեց փոխքաղաքապետ Հրաչյա Սարգսյանին։ Իսկ մինչ քվեարկությունը Հայկ Մարությանը վերջին ելույթն ունեցավ որպես քաղաքապետ, «հեղափոխական» թիմին փաստարկված մեղադրանքներ ներկայացնելով հեղափոխական օրակարգից շեղվելու, սեփական կոմֆորտը հանրային շահից գերագնահատելու մեջ։
«Երեք տարուց մի փոքր ավելի պաշտոնավարած Մարությանը հայտարարեց՝ տարբեր պաշտոնյաներից տարատեսակ զանգեր է ստացել, որոնք մերժել է. «Որոնք ասում էին՝ պարոն Մարության, քաղաքապետարանի էսինչ աշխատակիցը ինչ-որ «վատ» քոմենթ է գրել կամ «վատ» ստատուսի տակ լայք է դրել, իրենք պետք է աշխատանքից հանել։ Տասնյակ նման զանգեր եմ ստացել, ինչին ի պատասխան ասել եմ՝ ժողովուրդ ջան, հարգելիներս, հեղափոխությունն ախր նաև դրա համար ենք արել, որ հին ժամանակների նման չլինի, երբ քաղաքական հայացքների համար մարդկանց հետապնդում էին, աշխատանքից հեռացնում էին։ Ասում էի՝ ցավներդ տանեմ, երկիրը Ֆեյսբուքով չեն կառավարում»,- նշեց Մարությանը:
Արդեն նախկին քաղաքապետը քրեական մեղադրանքների մի ամբողջ շարք ներկայացրեց, կետ առ կետ ապացուցելով, որ գործող իշխանությունների խոսքն ու գործը իրականում չի համընկել, իսկ կոռուպցիան դարձել է փաշինյանական վարչախմբի հիմնական բանուգործը։ Իրավական երկրում նման ելույթը մի քանի քրեական գործեր հարուցելու առիթ կդառնար, մինչդեռ հայ հանրությունը վստահ է, որ հետապնդումների թիրախ կդառնա հենց ինքը՝ Հայկ Մարությանը։ Մարդ, ով հրաժարվեց պարել Նիկոլ Փաշինյանի դուդուկի տակ, այլ անտրտունջ արեց հնարավորը՝ իշխանական թիմի հարուցած խոչընդոտների ուղեկցությամբ։ Ցավալին, իհարկե, հեղափոխությունը սեփականաշնորհելու փաշինյանական վարչախմբի վարքն է, հռչակած արժեքներից հրաժարվելը, անսկզբունք կարիերիստներին առաջնային դեր տալը։ Իսկ Հայկ Մարությանն արդեն բոլոր հնարավորություններն ունի քաղաքական նոր գործոն և համախմբող դառնալու, ձեռնոց նետելու Փաշինյանին։ Նա հեռացավ քաղաքապետարանից՝ շրխկացնելով դուռը և լայն ապտակ հասցնելով փաշինյանական թիմին։
Արսեն Սահակյան
