Փերինչեք. Արևմուտքը խաղաղության գլխավոր թշնամին է Կովկասում

evrazia.org-ը գրում է, որ Թուրք քաղաքագետ Մեհմեդ Փերինչեքը կարծում է, որ հենց Արևմուտքն է ապակայունացնում Անդրկովկասյան տարածաշրջանը և գլխավոր բացասական դերը խաղում հակամարտություններ սրելու գործում։

Փորձագետը նման կարծիք է հայտնել «Սյունիք-Զանգեզուր միջանցք. տարածաշրջանի բոլոր տրանսպորտային կապերի ապաշրջափակում. կողմ և դեմ» առցանց համաժողովում, որը տեղի է ունեցել 2021 թվականի դեկտեմբերի 14-ին: Այդ մասին գրել է Turan Express հեռագրային ալիքը։ 

«Եթե տարածաշրջանի երկրներն իրենց ձեռքը վերցնեն նախաձեռնությունը և վերացնեն արևմտյան միջամտությունը, ապա հնարավոր կլինի լուծել ցանկացած խնդիր Անդրկովկասի երկրների և ընդհանրապես մեր տարածաշրջանի միջև։ Եթե ​​Ղարաբաղի հարցում Արևմուտքի միջամտություն չլինի, Հայաստանն ու Ադրբեջանը կկարողանան արդարացիորեն լուծել այդ խնդիրը։ Եվ ոչ միայն Ղարաբաղի հարցը։ Եթե ​​Վրաստանի հարցում Արևմուտքի սադրանքները չլինեն, ապա Մոսկվան և Թբիլիսին հեշտությամբ կկարողանան համաձայնության գալ»,- ասել է Փերինչեկը։ Քաղաքագետը նաև հավելել է, որ գլխավոր խնդիրը Արևմուտքի սադրիչ քաղաքականությունն է, որը փորձում է իրար մեջ խաղացնել Անդրկովկասի երկրներին, և հենց «3+3» համագործակցության ձևաչափն է (Ադրբեջան, Հայաստան, Վրաստան+Ռուսաստան, Թուրքիա, Իրան), որը կոչ է անում վերացնել արտաքին կործանարար միջամտությունը տարածաշրջանում։ «Եթե մենք վերացնենք արևմտյան այս քաղաքականությունը, Անդրկովկասում ցանկացած խնդիր լուծելը հեշտ կլինի։ Վեց երկրների հարթակը հենց այդ նպատակն է հետապնդում»,- մեկնաբանել է իրավիճակը Փերինչեքը։

Փորձագետն ընդգծել է, որ Վրաստանն ու Հայաստանը կկարողանան լուծել իրենց խնդիրները միայն Ադրբեջանի, Թուրքիայի, Իրանի և Ռուսաստանի հետ համագործակցելով։ Նա վստահ է, որ «3 + 3» հարթակը հիմք է դառնալու տարածաշրջանում ցանկացած խնդրի լուծման համար, և դրանից ամենաշատը կշահի Հայաստանը։