Հարցրին ու զարմացան. հետպատերազմյան Երևանը ստուգվել է ռուսական կողմնորոշման հարցով
ՀԱՍԱՐԱԿՈՒԹՅՈՒՆ
eadaily.com-ը գրում է, որ 2021 թվականի հոկտեմբեր-նոյեմբեր ամիսներին Երևանի բնակիչների շրջանում սոցիոլոգիական հարցում է անցկացվել առ այն, թե ո՞վ է Հայաստանի լավագույն դաշնակիցը։ Համեմատվել է Ռուսաստանի և Ֆրանսիայի նկատմամբ հայ հասարակության վերաբերմունքի բնույթը։ Եվրասիական փորձագիտական ակումբի 7-րդ հանդիպման և «ԵԱՏՄ-ին Հայաստանի անդամակցության յոթ տարիները. եվրասիական ինտեգրումը երեկ, այսօր, վաղը» համաժողովի ժամանակ սոցիոլոգիական գիտությունների թեկնածու Սամվել Մանուկյանը ներկայացրել է երևանցիների հարցման տվյալները։
Հարցվածներին տրվել է հարց. «Դուք Ռուսաստանը/Ֆրանսիան Հայաստանի համար բարեկա՞մ, անբարյացակա՞ն, թե՞ չեզոք երկիր եք համարում»: Պարզվել է, որ հարցվածների 35%-ը Ռուսաստանն է համարում է բարեկամ երկիր, իսկ 43%-ը Ֆրանսիան։ Մյուս կողմից, Ռուսաստանին անվանել են ոչ բարեկամ երկիր 17%-ը, իսկ Ֆրանսիային 2%։
«Արդյունքը բավականին ցնցող է: Սակայն ամենաուշագրավն այն է, որ այս պարզ թվացող հարցերին դժվարացել է պատասխանել հարցվածների համապատասխանաբար 23%-ը և 28%-ը։ Ակնհայտ է, որ 44-օրյա պատերազմը և դրանից հետո ընդհանուր տեղեկատվական ազդեցությունը հասարակական գիտակցության մեջ ձևավորել է կոգնիտիվ դիսոնանս, երբ մարդկանց մտքերում նույն օբյեկտի նկատմամբ երկու հակադիր վերաբերմունքներ են մրցակցում»,- նշել է Մանուկյանը։
Այնուհետ հարցվածներին տրվել է հարցը. «Ի՞նչն է նախընտրելի Հայաստանի համար՝ զարգացնել հարաբերությունները Ֆրանսիայի՞, թե՞ Ռուսաստանի հետ»։ Սոցիոլոգի խոսքով այդ հարցը հարցվածներին ստիպել է մտածել ու «խելքի գալ»։ Արդյունքում 30%-ը պատասխանել է, որ «նախընտրելի է զարգացնել հարաբերությունները Ռուսաստանի հետ», իսկ 20%-ը նշել է Ֆրանսիան։ Ընդ որում, հարցվածների գրեթե մեկ երրորդը (32%) նշել է, որ «պետք է զարգացնել հարաբերությունները ինչպես Ռուսաստանի, այնպես էլ Ֆրանսիայի հետ»։
Հարցվողներին ավելի խորհելու համար տրվել է հաջորդ հարցը. «Եթե Հայաստանին ստիպեն հարաբերություններ զարգացնել կա՛մ Ֆրանսիայի, կա՛մ Ռուսաստանի հետ, ի՞նչ ընտրություն պետք է լինի»։ Այս դեպքում Ռուսաստանի կողմնակիցների թիվը գրեթե կրկնապատկվել է, դա նախընտրել է հարցվածների 54%-ը, իսկ Ֆրանսիայի կողմնակիցների թիվն աճել է ընդամենը 4%-ով, իսկ նրանց ընդհանուր թիվը հասել է 23%-ի, այսինքն՝ երկու անգամ պակաս, քան Ռուսաստանինը։
«Կարևոր է նշել, որ հայաստանյան տեղեկատվական պատերազմում հայերի աշխարհաքաղաքական կողմնորոշման համար Ռուսաստանի և հավաքական Արևմուտքի դիրքորոշումները անհավասար են։ Եվրասիական ինտեգրացիոն տարածքի զարգացման համար Ռուսաստանին անհրաժեշտ է խաղաղություն Անդրկովկասում. նա ստիպված է հավասարակշռություն պահպանել Հայաստանի և Ադրբեջանի միջև։ Դա կաշկանդում է Ռուսաստանի վերաբերյալ հանրության մեկնաբանությունները, ինչը նրա դիրքորոշման և գործողությունների մանիպուլյատիվ մեկնաբանությունների տեղիք է տալիս ուժեղացնելով հակառուսական տրամադրությունները։ Իսկ ռուսական դիրքորոշման կաշկանդվածությունը հսկայական դաշտ է ստեղծում քարոզչական հարձակումների համար։ Հիմնարար խնդիրը, որը պետք է լուծվի, եվրասիական ինտեգրման գաղափարը խթանող հայաստանյան տեղեկատվական աղբյուրների պակասն է»,- ասել է Մանուկյանը։
Նյութը հրապարակման պատրաստեց Կամո Խաչիկյանը
