«Քաղաքագետների հիվանդ երևակայության պտուղը». Սատանովսկին այն մասին, թե իրականում ի՞նչ է կատարվում Հայաստանում
ՀԱՍԱՐԱԿՈՒԹՅՈՒՆ
ukraina.ru-ն գրում է, որ Ռուսաստանի հետ Հայաստանի էքզիստենցիալ կապը հայրենական քաղաքագետների հիվանդ երևակայության արգասիքն է, դա անգրագետ, անիմաստ տեսակետ է, քանի որ հայերը եղել են Մերձավոր և Միջին Արևելքում, Եվրոպայում մի քանի հազար տարի առաջ առանց Ռուսաստանի և մինչ նրա ստեղծվելը: Այս մասին Ukraina.ru-ին տված հարցազրույցում ասել է քաղաքագետ Եվգենի Սատանովսկին:
Նա հիշեցրել է, որ մեկ տարի առաջ՝ Լեռնային Ղարաբաղում սրման ժամանակ, RT-ի գլխավոր խմբագիր Մարգարիտա Սիմոնյանը սոցցանցերում գրառում էր կատարել ի պատասխան պաշտոնական Երևանին պաշտպանող հայ հանրության Ռուսաստանից Ադրբեջանի հետ հակամարտության վերաբերյալ «դիրքորոշում արտահայտելու» պահանջին։ Նրա խոսքով, Երևանը ողողված է հակառուսական հասարակական կազմակերպություններով և դարձել է Հյուսիսային Կովկասում հակառուսական ուժերի համար ցատկահարթակ։ Հայաստանի իշխանությունները երկրից վտարել են ռուսաստանցի հայ գործարարներին և շարունակում են «կեղտաջուր» թափել Ռուսաստանի վրա։
Սատանովսկին նշել է, որ այսօրվա Հայաստանը որպես պետություն իր գոյության համար պարտական է Ռուսաստանին, սակայն մինչ այդ եղել է ամերիկյան Հայաստան, Ֆրանսիական Հայաստան, լիբանանյան, իրանական Հայաստան, իսկ մինչ Հայոց ցեղասպանությունը Հայաստանը թուրքական էր, և այդ առումով հայերը ունեն հարուստ պատմություն, և այդ պատմության ընթացքում տարբեր բաներ են եղել, ներառյալ արմատական խմբերը: «Ամենաբացահայտ ահաբեկիչները, արմատականներն ու ահաբեկչական խմբերը տարբեր առիթներով փորձել են ինչ որ կերպ իրենց ոչն ասել Ռուսաստանին։ Գուցե թե դրանով կարելի է բացատրել այն ամենը, ինչ տեղի է ունենում հիմա: Ամերիկացիները, եթե կուզեք, գնել են ոչ թե Հայաստանը, այլ նրա ղեկավարությունը Բերեզովսկու սկզբունքով, որն է «մի գնեք գործարանը, գնեք տնօրենին»։ Դա աշխատում է, և ոչ միայն Հայաստանում»,- հայտարարել է Սատանովսկին։ Մասնագետը նշել է, որ հիմա տեսանելի է Հայաստանի վերափոխումը եվրոպա-ամերիկյան Հայաստանի, և երբ դրա լոբբինգն է արվում, ապա պարզվում է, որ այն հակառուսական Անդրկովկասի մի մասն է կազմում։ Հայաստանի այսօրվա ղեկավարությունն ավելի քան հակառուսական է, և այդ մարդիկ թքած ունեն, թե որտեղ է գտնվում Հայաստանը և ում շնորհիվ ընդհանրապես ունի պետականություն, եզրափակել է հրապարակման զրուցակիցը։
Նյութը հրապարակման պատրաստեց Կամո Խաչիկյանը
