ԵՄ ներկայությունը հույսեր է արթնացնում, որ սահմանազատման գործընթացը կլինի իրավական հիմքի վրա

Եվրոպական խորհրդի նախագահ Շառլ Միշելը Բրյուսելում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ դեկտեմբերի 14-ին մեկնարկած ու մի քանի ժամ տևած հանդիպման արդյունքներով հայտարարություն է տարածել, նաև հանդես եկել ճեպազրույցով՝ քննարկումները համարելով նշանակալի։

Այս մասի զրուցել ենք քաղաքագետ Արեգ Քոչինյանի հետ։

Հարցինշ թե ի՞նչ արդյունք տվեց այդ հանդիպումը ու ի՞նչ ակնկալիքներ կարող ենք ունենալ դրանցից՝ քաղաքագետը պատասխանել է․ « Կարող ենք արձանագրել, որ արդեն իսկ շատ կարևոր է կայացած հանդիպման փաստը։ Ըստ էության սա պատերազմից հետո առաջին անգամ էր, որ եռակողմ բանաձևին զուգահեռ որևէ այլ գործնական միջոցառում է կազմակերպվում, որի կազմակերպիչը Ռուսաստանը չէ և դա իսկապես կարևոր է։ Ցավոք սրտի, կարող ենք ասել, որ բրյուսելյան հանդիպումը չունեցավ որևէ գրավոր արձանագրում, ինչպես, օրինակ Սոչիի, Մոսկվայի հանդիպումների պարագայում էր: Կարևոր էր, որ սահմանագծման ու սահմանազատման աշխատանքներում նշվեց ԵՄ փորձագետների անհրաժեշտության մասին: Քանի որ արձանագրվել է, որ սահմանների ճշգրտման գործընթացը լինելու է երկկողմ, այսինքն լինելու են Հայաստանն ու Ադրբեջանը, իսկ Ռուսաստանն ունենալու է փորձագիտական ներգրավվածություն, հիմա ճիշտ աշխատանքի ու Արևմուտքի բավարար շահագրգռվածության դեպքում մենք կունենանք հնարավորություն թույլ չտալու, որպեսզի այս գործընթացում լինի միայն, այսպես ասած, ռուսական արբիտրաժը, այլ լինի և՛ Եվրամիության, և՛ ռուսական խորհրդատվական ներկայություն: Ինչո՞ւ է դա կարևոր, որովհետև ԵՄ ներկայությունը հույսեր է արթնացնում, որ այդ գործընթացը կլինի իրավական հիմքի վրա, որը ձեռնտու է հայկական կողմին, քանի որ իրավական բոլոր հիմքերը հօգուտ մեզ են, իսկ եթե միայն ռուսական խորհրդատվությունը կամ «արբիտրաժը» լիներ, մեծ կասկածներ ունեմ, որ գործընթացն իրավական հունով ընթանար, շատ հավանական է, որ ամեն բան կգնար քաղաքական հունով»։