Ո՞ւմ համար են ազատում Երևանի քաղաքապետի աթոռը
ՎԵՐԼՈՒԾՈՒԹՅՈՒՆՆԵՐ
Երևանի քաղաքապետի պաշտոնից Հայկ Մարությանի ազատումը դարձել է գործող իշխանությունների թիվ մեկ նպատակը։ Երեք փուլով անցկացված ՏԻՄ ընտրություններից հետո Նիկոլ Փաշինյանն այլևս պարապ է մնացել և որոշել է գրոհով վերցնել Երևանի քաղաքապետարանը։ Մեր տեղեկությունների համաձայն՝ վարչապետի պաշտոնը զբաղեցնող անձը բավական երկար է աշխատել այս ուղղությամբ։ Հայկ Մարությանի դեմ փաշինյանական քարոզչամեքենայի և սպասարկուների սկսած արշավն ինքնաբուխ և միանգամից չի սկսվել, «Քաղաքացիական պայմանագիրը» ամիսներ շարունակ տարբեր միջոցներ է մշակել, թե ինչպես ազատվեն միակ աշխատող պաշտոնյայից։
Դեռևս պատերազմից հետո, երբ Մարությանը հրաժարվեց ՔՊ անդամությունից, չմասնակցեց խորհրդարանական ընտրությունների քարոզարշավին, ավագանու «Իմ քայլը» խմբակցության՝ Փաշինյանին նվիրված անդամները, որոնց թիվն այնքան էլ մեծ չէ, զրույցներ են ունեցել ավագանու մյուս անդամների հետ։ Մեր աղբյուրի փոխանցմամբ՝ շատ ավելի հեշտ է եղել լեզու գտնել ընդդիմադիր խմբակցությունների անդամների, քան «Իմ քայլի» ներկայացուցիչների հետ։ ԲՀԿ խմբակցության դեպքում Փաշինյանն ակնկալում է «դաբռոն» ստանալ անմիջապես Գագիկ Ծառուկյանից, «Լույս» խմբակցությունից էլ միայն Թեհմինե Վարդանյանի հետ հույսեր չեն կապում։ «Իմ քայլում» լուրջ խմորումներ են, փաշինայանական թևին դեռ չի հաջողվում, ու թերևս, չհաջողվի լեզու գտնել խմբակիցների հետ։ Ամեն դեպքում, Փաշինյանն արդեն որոշումը կայացրել է, հստակ հրահանգներ է իջեցրել բոլոր կուսակիցներին, քարոզչական թիմին, ֆեյքերի ֆաբրիկային և․․․ սեփական ընտանիքին, որին պատկանող թերթն էլ դարձել է Մարությանի դեմ կեղտոտ բամբասանքներ տարածելու առաջամարտիկը։ Իդեալական տարբերակը, ըստ Փաշինյանի, Հայկ Մարությանին հրաժարական պարտադրելն է։ Այդ դեպքում ավագանու կազմից որևէ մեկին ժամանակավոր քաղաքապետ կնշանակեն, մինչև ընտրությունների համար հարմար ժամանակ լինի։ Իշխանությունն այս տարբերակի համար մի քանի հերթապահ թեկնածուներ ունի՝ առաջին փոխքաղաքապետ, «Առաքելություն» կուսակցության նախկին անդամ Հրաչյա Սարգսյան, Շուկայի վերահսկողության տեսչական մարմնի ղեկավար Արմեն Կոտոլյան։
Այդուհանդերձ, Երևանի քաղաքապետի պաշտոնը Փաշինյանը նախատեսում է նախկին փոխվարչապետ Տիգրան Ավինյանի համար։ Չնայած Ավինյանը ՏԻՄ ընտրություններում ձախողել է հնարավոր բոլոր առաջադրանքները, սակայն կարողացել է կրկին դառնալ Փաշինյանի աչքի լույսը։ Երևանում նոր քաղաքապետ ունենալու խնդիրը, սակայն, բարդ լուծելի է Նիկոլ Փաշինյանի համար։ ՔՊ-ականներն իրենք էլ կասկածներ ունեն, որ Հայկ Մարությանը կարող է սկզբունքային և ամուր դիրքորոշում ունենալ, մինչև վերջ կռիվ տալ՝ իրեն «գծերից գցելու» օպերացիայի դեմ։ Իսկ արտահերթ ընտրությունների դեպքում «Քաղաքացիական պայմանագիրը» կարող է պարզապես կորցնել իշխանությունը Երևանում։ Դա աղետալի հետևանքներ կունենա Նիկոլ Փաշինյանի և նրա ապիկար թիմի հետագա ճակատագրի համար:
Արթուր Ոսկանյան
