Թուրքիայում ընդդիմության առաջնորդները նախագահական արտահերթ ընտրության կոչ են արել

Ժողովրդահանրապետական ու «Լավ» կուսակցությունների առաջնորդներ Քեմալ Քըլըչդարօղլուն ու Մերալ Աքշեները Թուրքիայի նախագահ Ռեջեփ Թայիփ Էրդողանին ոչ կոմպետենտ լինելու մեղադրանք են ուղղել: Հիմնական ընդդիմադիր ուժերի ղեկավարները լիրայի փոխարժեքի ռեկորդային անկման ֆոնին կոչ են արել արտահերթ ընտրություն անցկացնել:
Թուրքիայի կենտրոնական բանկը երեկ որոշել է հաշվարկային տոկոսադրույքը 16 տոկոսից նվազեցնել մինչև 15 տոկոս: Արդյունքում թուրքական արժույթի փոխարժեքը շարունակել է նվազել՝ թարմացնելով պատմական մինիմումը ( մեկ դոլարի դիմաց 11,29 լիրա), ինչը նոր հակառեկորդ է դարձել։

«Էրդողանը երկիրը հասցրել է աղետալի վիճակի, որից 84 մլն մարդ է տուժում։ Ամբողջ երկիրը մտահոգված է, սպասում ենք վաղվա օրվան։ Մի՞թե նման կյանքը հարիր է մեր ժողովրդին։ Այս ամենը կշտկվի միայն արտահերթ ընտրության միջոցով», - Twitter-ում գրել է Քըլըչդարօղլուն։

Աքշեներն էլ հայտարարել է, որ Թուրքիայի նախագահը ոչնչացրել է երկրի հեղինակությունը։

«Եթե դա միտումնավոր է արվել, ուրեմն բացահայտ դավաճանություն է։ Իսկ եթե դա քո ոչ կոմպետենտության հետևանքն է, ապա ակնհայտ է, թե ինչ է պետք անել՝ երկրում ընտրություններ անցկացնել ու դադարեցնել այս խայտառակությունը», – Twitter–ում գրել է Աքշեները՝ դիմելով Էրդողանին։

Հիշեցնենք, որ Թուրքիայում նախագահական ու խորհրդարանական հերթական ընտրությունները նախատեսված են 2023 թվականի հունիսին: