Ադրբեջանը Google Maps-ից պահանջել է վերանվանել Լեռնային Ղարաբաղի հայկական քաղաքների անվանումները
ՀԱՍԱՐԱԿՈՒԹՅՈՒՆ
ferra.ru-ն գրում է, որ Ադրբեջանը դիմել է Google-ին պահանջելով նախաձեռնել Լեռնային Ղարաբաղի քաղաքների և բոլոր բնակավայրերի, ինչպես նաև պատմական հուշարձանների հայկականից ադրբեջաներեն անվանափոխելու գործընթացը։ Այդ մասին հայտարարել է Ադրբեջանի մշակույթի նախարարությանը կից մշակութային ժառանգության պահպանության, զարգացման և վերականգնման պետական ծառայության ղեկավար Ազադ Ջաֆարլին։ Պաշտոնյայի խոսքով, Google Maps- ի համար ժամանակ կպահանջվի, որպեսզի փոխի քաղաքների և այլ տեղանունների բոլոր հայկական անունները ադրբեջաներեն: Հայտնի չէ, թե որքանո՞վ է դա իրականալի, քանի որ ադրբեջանական կողմը նոր է սկսել բանակցությունները։ Միաժամանակ չի նշվել, թե հայկական որ տեղանունները, ըստ Ջաֆարլիի, պետք է վերանվանվեն։ Խոսքը, ամենայն հավանականությամբ, տեղանունների անվանումները հայերենից ադրբեջաներենի ամբողջական փոփոխության մասին է։ Նշվել է միայն, որ Հայաստանի և Ադրբեջանի միջև, բացի ռազմականից, կան մշակութային տարբերություններ։ Օրինակ, Լեռնային Ղարաբաղի ամենամեծ քաղաքներից մեկը հայերեն կոչվում է Շուշի, իսկ ադրբեջաներեն Շուշա։ Հավանաբար, հենց այդպիսի ճշգրտումների է ուզում հասնել Ադրբեջանը Google Maps-ից։
Նյութը հրապարակման պատրաստեց Կամո Խաչիկյանը
