Հայաստանում մարդիկ խուսափում են AstraZeneca պատվաստանյութից
ՀԱՍԱՐԱԿՈՒԹՅՈՒՆ
Կորոնավիրուսի դեպքերը վերջին շրջանում կրկին ավելացել են։ Այս թեմայով զրուցել ենք բժիշկ, վարակաբան Արմեն Օհանյանի հետ։
Հարցին, թե ինչ կարող ենք սպասել թվերի այս վայրիվերումներից, մասնագետը պատասխանել է, որ մոտ ապագայում սպավում է թվերի նվազում․ «Մենք գնում ենք մարման։ Այդ թվերը մի քանի օր կարող են բարձրանալ, օրական 1000-1500 նոր ցուցանիշ լինի, բայց դա սկզբունքային դեր չի խաղում, միանշանակ կարող ենք ասել, որ գնում է դեպի մարում։ Եվ այս փուլով մենք հաստատ ավարտելու ենք համավարակի հետ մեր առնչությունը»։
Անդրադառնալով պատվաստումներին Արմեն Օհանյանը ասաց, որ Հայաստանում շատ երկար ժամանակ է պահանջվելու, որպեսզի հնարավոր լինի պատվաստանյութի շնորհիվ հասնել իմուն բարիերի ձևավորման. «Այսօրվա դրությամբ մեզ մոտ մի քանի հազարի կարգի է պատվաստվածների թիվը, դա եղած-չեղած մի հաշիվ է։ Եթե անգամ 30 հազար մարդ էլ պատվաստվի, համաճարակաբանության տեսանկյունից դեր չի խաղալու»։
Հարցին, թե ինչո՞ւ են հայերը խուսափում պատվաստվելուց մասնագետը պատասխանեց․ «Մեր բնակչությունն առհասարակ յուրահատուկ է։ Իրենք սիրում են հակառակվել ինչ-որ բանի, ամեն նոր երևույթի առաջին արձագանքը հակասական է։ Եվ այս իրավիճակում, հաշվի առնելով անվստահությունը, հաշվի առնելով, որ օբյեկտիվ տվյալներ կան նույն AstraZeneca պատվաստանյութի հետ կապված, մարդկանց իրոք վախեցնում է պատվաստվելը։ Ես ճիշտ չեմ համարում որևէ պատվաստանյութի անուն տալ, բայց ստիպված եմ։ Իմ դիտարկումները ցույց են տալիս, որ Sputnik V պատվաստանյութից մարդիկ չեն խուսափում։ Բայց այսօր մարդկանց դնում ու ասում են՝ կապ չունի, դու հիվանդացել ես, թե չես հիվանդացել, հետո ի՞նչ, որ դու մի ամիս ծանր պառկած էիր, արի քեզ պատվաստեմ։ Եվ մտածող մարդու ուղեղում հարց է ծագում, եթե ես հիվանդացել եմ, իմ մոտ իմունիտետ չի ձևավորվել, ո՞վ ասաց, որ պատվաստանյութից պետք է իմունիտետ ձևավորվի։ Եթե այդ հարցին պատասխան կտան, ես էլ խորհուրդ կտամ, որ արդեն հիվանդացած մարդիկ պատվաստվեն»։
Սոնա Գիշյան
