Որո՞նք են սխտորի ամենաօգտակար ու վնասակար հատկությունները

Սխտորը համարվում է շատ օգտակար մթերք, ուստի մարդիկ այն հաճախ են ներառում իրենց սննդակարգում առողջական ամենատարբեր խնդիրների կանխարգելման և անգամ բուժման համար, սակայն քչերին է հայտնի, որ սխտորն իրականում կարող է և վնասակար լինել, ուստի այն ոչ մի դեպքում չի կարելի չարաշահել՝ համարելով համադարման։

Տեխասի տեխնոլոգիական համալսարանի մասնագետ Քրիստինա Պետերսոնը ներկայացրել է այս մթերքի օգտակար ու վնասակար հատկությունները, որոնք ոչ բոլորին են հայտնի։ Մասնագետի խոսքով՝ պնդումն այն մասին, որ սխտորը կարող է կանխել հիվանդությունների մեծ մասը, կարող է լրջորեն չափազանցված լինել, ուստի այն օգտագործելիս հարկավոր է շատ ուշադիր լինել։

Ուտեստներին յուրահատուկ համ ու բույր հաղորդող այս մթերքն ունի շատ ցածր կալորիականություն, սակայն միևնույն ժամանակ այն պարունակում է մեծ քանակությամբ սննդարար նյութեր, այդ թվում՝ B6 և C վիտամիններ, մանգան և այլն։ Բացի այդ, այն հարուստ է նաև ծծմբային միացություններով, որոնք էլ մթերքին յուրահատուկ կծու համ են հաղորդում։ Այդ տարրերից ամենաուսումնասիրվածն ալիցինն է, որի յուրահատուկ հատկությունների մասին շատերն են լսել։

Նման յուրահատուկ բաղադրության շնորհիվ սխտորն օժտված է բազմաթիվ օգտակար հատկություններով, որոնք չի կարելի թերագնահատել։ Փորձագետի խոսքով՝ այս մթերքը հակաբորբոքային ազդեցություն է ունենում, ինչպես նաև նվազեցնում է արյան մեջ խոլեստերինի մակարդակը, զարկերակային ճնշումն ու արյան մեջ շաքարի մակարդակը, ուստի կարող է շատ արդյունավետ լինել հիմնական բուժման հետ համադրելու դեպքում։

Միևնույն ժամանակ մասնագետը խորհուրդ չի տալիս ինքնուրույն սխտորի հիման վրա պատրաստված հավելումներ ընդունել։ Նման միջոցները կարելի է ընդունել միայն որոշակի դեպքերում և միայն բժշկի նշանակմամբ, քանի որ հակառակ դեպքում դրանք կարող են վտանգավոր լինել։

Բանն այն է, որ սխտորի հակաքաղցկեղային հատկությունների ուսումնասիրությունը որևէ դրական արդյունք չի տվել։ Միևնույն ժամանակ հետազոտությունները ցույց են տվել, որ այն կարող է փոխգործակցության մեջ մտնել որոշակի դեղամիջոցների, այդ թվում նաև արյունը ջրիկացնող միջոցների՝ հակակոագուլյանտների հետ։ Սա է պատճառը, որ հակակոագուլյանտներ ընդունող մարդիկ պետք է խուսափեն սխտորի գործածությունից վիրահատական վիջամտություններից կամ ատամնաբուժական պրոցեդուրաներից առնվազն յոթ օր առաջ։