«Մենք կպատասխանենք ԱՄՆ-ի կողմից ցանկացած անբարյացկամ քայլի»․ Լավրով

Ռուսաստանի Դաշնության արտաքին գործերի նախարար Սերգեյ Լավրովը Ղազախստանի փոխվարչապետ և արտգործնախարար Մուխթար Տլեուբերդիի հետ բանակցություններից հետո հայտարարել է, որ Ռուսաստանը կպատասխանի Ամերիկայի Միացյալ Նահանգների կողմից Մոսկվային ուղղված անբարյացակամ ցանկացած քայլի, հայտնում է ՏԱՍՍ լրատվական գործակալությունը։

Ավելի վաղ լրատվամիջոցներում լուրեր էին տարածվել այն մասին, որ ԱՄՆ-ի նախագահ Ջո Բայդենի վարչակազմը քննարկում է ռուս դիվանագետներին երկրից արտաքսելու և Ռուսաստանի Դաշնության նկատմամբ նոր պատժամիջոցներ կիրառելու հնարավորությունը՝ ի պատասխան ՌԴ-ի կողմից Միացյալ Նահանգների նախագահական ընտրություններին միջամտելուն, որի համար Մոսկվան շարունակաբար մեղադրվում է:

«Մենք կպատասխանենք ցանկացած անբարյացկամ քայլի։ Քանի դեռ հստակ որոշումներ չեմ տեսնել, ոչինչ չի հայտարարվել։ Ես կարդացի զեկույցներն այն մասին, որ վարչակազմը ավարտել է Ռուսաստանի «թշնամական գործողությունների» վերանայումը։ Ինչ-որ կերպ նրանց մոտ դա շատ արագ ստացվեց։ Նրանք մեզ հավանաբար այլ ձևերով են պատժելու», - ասել է ՌԴ ԱԳ նախարարը։

Լավրովը հավելել է, որ պետքարտուղարության ներկայացուցիչների հայտարարությունները Մոսկվայի հետ կայուն հարաբերությունների հարցում Վաշինգտոնի շահագրգռվածության մասին համոզիչ չեն և նշել, որ իրենք կսպասեն հստակ գործողությունների։

Լավրովը մատնանշել է նաև Մոսկվայի նկատմամբ Վաշինգտոնի պատժամիջոցային քաղաքականության անօգուտ լինելը և այս մոտեցումն անվանել «փակուղի» և «հիմարություն» և շեշտել, որ այս բոլոր իրադարձությունները ցույց են տալիս, որ իրենք պետք է ապավինեն միայն իրենց ուժերին և, որ ԱՄՆ-ն և դրա դաշնակիցները հուսալի գործընկերներ չեն։