Ստավրոպոլյան գործարարները քննարկել են Հայաստանի շուկա մտնելու հնարավորությունները
ՀԱՍԱՐԱԿՈՒԹՅՈՒՆ
vechorka.ru-ն գրում է, որ Հայաստանում Ռուսաստանի առևտրային առաքելությունը Ստավրոպոլի երկրամասի բիզնեսի ներկայացուցիչների համար անց է կացրել «Ժամ առևտրի ներկայացուցչի հետ» տեսաժողովային հանդիպումը: Միջոցառումները կազմակերպել է տնտեսական զարգացման տարածաշրջանային նախարարությունը: Կողմերը քննարկել են առևտրատնտեսական կապերի ներկա վիճակը: Հայաստանում Ռուսաստանի առևտրի ներկայացուցիչ Աննա Դոնչենկոն զեկուցել է վերջին տարիներին Ստավրոպոլի երկրամասի և Հայաստանի միջև երկկողմ համագործակցության բարձր մակարդակի մասին: Բացի այդ, նա խոսել է երկկողմ առևտրի առկա նոմենկլատուրայի, ինչպես նաև Ստավրոպոլի արտադրանքը Հայաստան արտահանելու խոստումնալից հնարավորությունների մասին:
«Առևտրի ներկայացուցչության հիմնական առաքելությունն է ընդլայնել և ամրապնդել ռուսական բիզնեսի դիրքերը հայկական շուկայում, նպաստել ռուսական ապրանքների մուտքին հանրապետության շուկա, աջակցել արտաքին տնտեսական նախագծերի իրականացմանը», - նշել է Աննա Դոնչենկոն:
Ստավրոպոլի երկրամասի տնտեսական զարգացման փոխնախարար Սյուզաննա Դամիրը նշել է, որ Հայաստանը իրենց տարածաշրջանի հին տնտեսական գործընկերն է: 2020 թվականին տարածաշրջանը հանրապետություն է արտահանել 39,8 միլիոն դոլար արժողությամբ ապրանքներ: Հատկանշական է, որ համաճարակը դրական ճշգրտումներ է մտցրել արտաքին տնտեսական գործունեության մեջ. արտահանումը 2020 թվականին աճել է 12 տոկոսով:
Ստավրոպոլի գործարարները հանդես են եկել իրենց արտադրանքների շնորհանդեսներով: Միջոցառմանը ներկա են եղել ավելի քան 30 ընկերություններ, որոնք ներկայացնում են տարբեր ճյուղեր` ագրոարդյունաբերական համալիրից և վերամշակող արդյունաբերությունից սկսած մինչև սարքավորումներ արտադրողներ և քիմիական արդյունաբերություն: Հատուկ ուշադրություն է դարձվել Ստավրոպոլի երկրամասի այցեքարտին՝ հանքային ջրին:
Նյութը հրապարակման պատրաստեց Կամո Խաչիկյանը
