ՌԴ ՊՆ-ն նոր հաղորդագրություն է տարածել

Լեռնային Ղարաբաղում ռուսական խաղաղապահ զորախմբի հատուկ նշանակության բժշկական ջոկատը շարունակում է օգնություն ցուցաբերել տեղի բնակչությանը ինչպես Ստեփանակերտում, այնպես էլ Լեռնային Ղարաբաղի այլ բնակավայրերում, հաղորդում է ՌԴ ՊՆ-ն։

Ստեղծվել են բազմաֆունկցիոնալ բժշկական բրիգադներ՝ Լեռնային Ղարաբաղի հեռավոր բնակավայրերում բժշկական օգնություն ցույց տալու համար․ անցած օրվա ընթացքում ռուս զինվորական բժիշկները բուժօգնություն են ցուցաբերել Կաղարծի բնակավայրի 21 բնակչի։

Նշվում է, որ ՌԴ ՊՆ-ի դաշտային հոսպիտալում որակավորված բժշկական օգնություն է ստացել Լեռնային Ղարաբաղի ավելի քան 900 բնակիչ, այդ թվում՝ ավելի քան 120 երեխա:

Թերապևտների, վիրաբույժների և այլ մասնագետների զննումից հետո քաղաքացիները ստացել են խորհրդատվություն և անհրաժեշտ նշանակումներ։ Տեղի բնակիչների գանգատները մասնավորապես կապված են քրոնիկ հիվանդությունների, ինչպես նաև սիրտ-անոթային և էնդոկրին համակարգի հիվանդությունների սրման, ատամնաբուժական խնդիրների հետ, ասված է հաղորդագրության մեջ։