Քաղաքակիրթ Եվրոպան չի կարողանում մարսել հանդուգն բատկայի ներկայությունը
ՄԻՋԱԶԳԱՅԻՆ
Եվրամիության դիվանագիտության ղեկավար Ժոզեպ Բորելը հայտարարել է, որ Ալեքսանդր Լուկաշենկոյի երդմնակալությունը զուրկ է դեմոկրատական լեգիտիմությունից: ԵՄ-ն կրկին հաստատել է, որ Բելառուսում կայացած նախագահական ընտրությունները ո՛չ ազատ էին, ո՛չ արդար և ԵՄ-ն չի ճանաչում կեղծված արդյունքները, իսկ երդմնակալությունը և Լուկաշենկոյին նախագահի մանդատը կրկին տրամադրելը զուրկ են լեգիտիմ լինելուց: Սա խոսում է այն մասին, որ այնուամենայնիվ, միջազգային ուժերին չհաջողվեց մեկուսացնել Բելառուսի երկարամյա նախագահին, որին մինչ օրս հաջողվել է բարեհաջող կերպով պահպանել խորհրդային կարգերից ժառանգություն ստացածն ու շարունակել հին ավանդույթներով երկիրը կառավարելը:
Ստացվում է, որ հետխորհրդային երկրներից միայն Բելառուսն է, որին դեռ չի հաջողվել, եվրոպական արժեքների միֆն օգտագործելով, քաոսային իրավիճակ ստեղծել երկրում: Եվ, չնայած, Բելառուսի նախագահն ինքն էլ է խոստովանել, որ բավական երկար ժամանակ է մնացել երկրի նախագահի աթոռին, սակայն, իրադարձությունները խոսում են այն մասին, որ այս անգամ էլ նրան հնարավոր չի լինի հեռացնել պաշտոնից: Երկրում ուկրաինական քաոսի սցենար թույլ չտալու համար նրան մնում է միայն գտնտել այնպիսի առաջնորդի, որը կշարունակի իր ուղին: Չնայած, որ նման առաջնորդ գտնելը կլինի շատ բարդ, եթե չասենք՝ անհնարին:
Համավարակի շրջանում Բելառուսի նախագահի կողմից իրականացված քայլերը ցույց տվեցին, որ Լուկաշենկոն չի պատրաստվում ենթարկվել միջազգային կազմակերպությունների հորդորներին ու պահանջներին: Եվ այս ամենը քաղաքակիրթ եվրոպան չի կարողանալու մարսել: Ուստի, պատրաստ է անել ամեն ինչ, որպեսզի Բելառուսի շուրջ օղակը նեղացնելու միջոցով հասնի ցանկալի արդյունքի, որը, սակայն, գոնե այս պահին դեռ անհնարին է:
