Ինքներդ ձեզ 3 մլն եք պարգեւատրում, մենք այդ միլիոնները չենք տեսնում, 50 հազար դրամի վրա ենք ուրախանում. Մխչյանի բնակիչ
ՎԻԴԵՈՄենք այդ անասունից ստանում ենք 30-ից 50 հազար դրամ փող, էդ էլ տանենք իրենց տանք սպանդանոցին. դա որքանո՞վ է ճիշտ։ Այս մասին, այսօր՝ հունվարի 21-ին, NEWS.am-ի հետ զրույցում ասաց Արարատի մարզի Մխչյան գյուղի բնակիչներից մեկը։ Նշենք, որ Մխչյանի բնակիչները բողոքում են օրենքի դրույթի դեմ, որով պարտադիր է դառնում անասունների մորթը կազմակերպել միայն սպանդանոցներում:
«Երբ հորթը ծնվում է, 2 տարի չարչարվում ենք էդ հորթի վրա, հետո 10-ից 12-ամիս բտման ենք տալիս։ Երբ այդ ծախսերը հանում ենք, 50 հազարն էլ չի մնում։ Մենք պահանջներ չենք ներկայացնում, գյուղացին խելոք իր համար գլուխը մտցրել է թրիքի ու հողի մեջ յոլա է գնում։ Հարգելի Կառավարություն, նստել եք ձեր սենյակները, ձեր տաք աթոռին, ինքներդ ձեզ գրիչով 3 միլիոն պարգեւատրում, 2 միլիոն պարգեւատրում, իսկ մենք այդ միլիոնները չեն տեսնում, մեր 50 հազար դրամի վրա ենք ուրախանում»,- ասաց բնակիչներից մեկը։
Նա նշեց, որ սպանդանոցներում կասկածելի է, արդյոք ի՞ր անասունն է մորթվում, թե՞ ոչ.
«Ես Եվրոպայի սպանդանոցներից մեկում եմ աշխատել, անասունն եկել է, անասունի տերը տեսնում է, թե ոնց է իր անասունը մորթվում, արդյոք ի՞ր անասունն է կշռվում, թե՞ ոչ։ Ես 200 կիլոգրամանոց անասունը մտցնելու եմ, էն մյուս կողմից 100 կիլոգրամը հանելու է»։
Ավելի վաղ NEWS.am-ը հայտնել էր, որ անասնաբուծությամբ զբաղվողների դժգոհությունը կապված է իրենց բնակավայրերից սպանդանոցների հեռավորության, դրանց առաջարկած գների հետ: Նրանք պնդում են, որ սպանդանոցային մորթը պարտադիր դարձնելով իրենց զրկում է եկամուտից: Նրանք վերջին օրերին բողոքի ակցիաներ էին իրականացնում կառավարության շենքի մոտ` պահանջելով հանդիպում վարչապետի հետ: Նրանց ակցիան նախօրեին ուղեկցվել էր փողոց փակելով:
Հիշեցնենք, որ այս տարվա հունվարի 15-ից ուժի մեջ է մտել կառավարության ընդունած որոշումը, ըստ որի` Հայաստանի ամբողջ տարածքում վաճառվող միսը պետք է ունենա սպանդանոցում մորթված լինելը հավաստող փաստաթուղթ, ինչն անվտանգության երաշխիք է։
