Թուրքիայում սաուդացի լրագրողին խեղդամահ են արել
ՄԻՋԱԶԳԱՅԻՆՍտամբուլում Սաուդյան Արաբիայի հյուպատոսության շենքում սպանված սաուդացի ընդդիմադիր լրագրող Ջամալ Հաշքաջիին սպանել են խեղդամահ անելու միջոցով:
Այս մասին, ինչպես հաղորդում է «Արմենպրես»-ը, հայտնում Reuters-ը:
Reuters-ի փոխանցմամբ՝ Սաուդյան Արաբիայի կառավարության բարձրաստիճան պաշտոնյաներից մեկն իրենց հայտնել է, որ սկզբնապես նախատեսված չի եղել սպանել Հաշքաջիին:
Տեղեկության համաձայն՝ Սաուդյան Արաբիայի իշխանությունները Թուրքիա են ուղարկել 15 անձի, ովքեր հանգիստ ձևով պետք է Հաշքաջիին համոզեին վերադառնալ հայրենիք:
Լրագրողի հետ հանդիպման ժամանակ այս 15 անձինք սկսել են սպառնալ նրան, իսկ լրագրողը դիմադրել է, օգնություն կանչել, ինչից այդ անձինք ընկել են խուճապի մեջ:
Այդ խմբի անդամները փորձել են լռեցնել Հաշքաջիին, ինչի հետևանքով նա շնչահեղձ է եղել:
Հաշքաքջիին սպանելուց հետո նրա մարմինը փաթաթել են գորգով, հյուպատոսական մեքենայով դուրս բերել և հանձնել իրենց մտերիմ ստամբուլցիներից մեկին:
Հանցավոր խմբի անդամներից մեկը հագել է Հաշքաջիի շորերը դուրս եկել հյուպատոսության շենքից, որպեսզի անվտանգության տեսախցիկները ֆիքսեն, թե «ինչպես է Հաշքաջին դուրս գալիս» շենքից:
Թուրքական ոստիկանությունը Ստամբուլում Սաուդյան Արաբիայի հյուպատոսություն մուտք գործելուց հետո անհետացած սաուդացի լրագրող Ջամալ Հաշքաջիի մարմնի մասունքները փնտրում է Ստամբուլին հարակից անտառում:
Թուրք քննիչները Սաուդյան Արաբիայի հյուպատոսությունում իրականացրած խուզարկության ժամանակ ձեռք են բերել տարբեր նմուշներ, որոնցով ստուգում են Հաշքաջիի ԴՆԹ հետքերի առկայությունը:
Ոստիկանության վարկածի համաձայն՝ հնարավոր է, որ լրագրողի մարմնի մասունքները թաքցված լինեն Ստամբուլին հարակից անտառում:
Մեկ այլ վարկածի համաձայն էլ՝ հնարավոր է, որ լրագրողի մարմնի մասունքները թաքցվել են Յալովա քաղաքի մոտակայքում:
