ԵՄ-ն պատրաստ է ծածկել Ուկրաինայի համար լրացուցիչ 70 միլիարդ եվրոյի մեծ մասը. Կոշտա

Եվրամիությունը պատրաստ է ծածկել Ուկրաինայի կողմից պահանջված լրացուցիչ 70 միլիարդ եվրոյի երկու երրորդը, այսինքն՝ շուրջ 46,7 միլիարդը: Այս մասին հայտարարել է Եվրոպական խորհրդի նախագահ Անտոնիու Կոշտան, հաղորդում է ՏԱՍՍ-ը:

«Սովորաբար մենք ծածկում ենք Ուկրաինայի ֆինանսական կարիքների երկու երրորդը: Եվրոպական խորհրդի վերջին նիստում մենք պայմանավորվել ենք ապահովել Ուկրաինայի լրացուցիչ կարիքները և Եվրոպական հանձնաժողովին հանձնարարել ենք ներկայացնել կոնկրետ լուծումներ այս հարցով: Եվրահանձնաժողովն աշխատանքներ է տանում, և ես կարծում եմ, որ նոյեմբերին մենք կկարողանանք որոշում կայացնել այս հարցի վերաբերյալ»,- ասել է նա Rapporteur պորտալին տված հարցազրույցում:

«Եթե եվրոպական առաջնորդները չկարողանան համաձայնության գալ նոյեմբերի 26-27-ի արտահերթ հանդիպմանը, նրանք կփորձեն համաձայնության հասնել դեկտեմբերի 17-18-ի նիստում»,- հավելել է Կոշտան:

Ինչպես գրում է պորտալը, ԵՄ-ն կոչ է արել, մասնավորապես, Մեծ Բրիտանիային, Կանադային և Նորվեգիային ակտիվացնել ջանքերը և լրացուցիչ միջոցներ հատկացնել Կիևի նոր հայտը բավարարելու համար:

Ավելի վաղ ԵՄ գագաթնաժողովում Վլադիմիր Զելենսկին հայտարարել էր, որ Ուկրաինային անհրաժեշտ է լրացուցիչ 70 միլիարդ եվրո Եվրամիությունից՝ 2027 թվականի ռազմական կարիքների համար: Ինչպես հոկտեմբերի 19-ին նշել էր իտալական La Repubblica թերթը, Եվրոպայում ապշած են Զելենսկու այս պահանջից: Մինչ այդ ԵՄ երկրներն արդեն հատկացրել էին 90 միլիարդ եվրո, որոնք պետք է Ուկրաինային տրամադրվեն առաջիկա երկու տարիների ընթացքում: