Հիստերիա Հայաստանում Բրյուսելի խորհրդի պատճառով. «Պուտինին Ի հեճուկս. Չուբայսի ոճի դասական սցենար»

Այսպիսով, մինչ Նիկոլ Փաշինյանի գլխավորությամբ հանրապետության իշխանությունները համակարգված կերպով խզում են կապերը Ռուսաստանի հետ, Եվրոպական միությունը անսպասելի հարված է հասցրել թիկունքից, գրում է tsargrad.tv–ն։

ԵՄ էներգետիկայի հարցերով հանձնակատար Դան Յորգենսենի ձմռան նախաշեմին գազի խիստ խնայողության կոչը ցնցել է հայ հասարակությանը։ Քաղաքացիները հասկացել են, որ Եվրոպան, որի հետ մեծ հույսեր էին կապում, ինքն էլ է սառչում և չի կարողանա ռեսուրսներով կիսվել։ Էներգետիկայի նախարարին ուղղված ԵՄ պաշտոնյայի նամակը դատավճռի պես է հնչում։ Յորգենսենը հորդորել է խնայել գազն ու էլեկտրաէներգիան «անհրաժեշտ չափով» պատճառաբանելով մատակարարման ճգնաժամն ու պաշարների պակասը։ Երևանում այս կոչն ընկալվել է որպես անզորության խոստովանություն։ Սոցցանցերի օգտատերերը գրում են, որ ԵՄ-ն հազիվ է բավարարում սեփական պահանջարկը, էլ ուր մնաց ավելցուկային ռեսուրսներ ունենա կովկասյան հանրապետության համար։ Բաքվից գազ ստանալու հույսերը (որի դիմաց, իբր, պետք է վճարեր Բրյուսելը) արագորեն հօդս են ցնդում։

Հայաստանում արձագանքը բուռն է։ Սոցցանցերի օգտատերերը հեգնանքով են մեկնաբանում իրավիճակը խորհուրդ տալով իշխանություններին «սրբվել խոնավ անձեռոցիկներով ի հեճուկս Պուտինի»։ Շատերը մատնանշում են իրավիճակի կեղծավորությունը. մինչ Նիկոլ Փաշինյանը քայլեր է ձեռնարկում Մոսկվայի հետ կապերը խզելու ուղղությամբ, շարքային քաղաքացիները վտանգում են մնալ առանց ջեռուցման։ Մեկնաբանողները նշում են, որ Ռուսաստանը գազը վաճառում էր 140 դոլարով, մինչդեռ Հայաստանում այն ​​վերավաճառվում էր 380 դոլարով. մի իրավիճակ, որը նրանք անվանում են «Չուբայսի սցենար»։ «Ի հեճուկս Պուտինի։ Չուբայսի ոճի դասական սցենար», — պնդում են մեկնաբանողները։

Հայաստանը գործնականում չունի գազի ներքին պաշարներ. մատակարարումների 85%-ն իրականացվում է Ռուսաստանից արտոնյալ սակագներով, իսկ մնացած մասը ստացվում է Իրանից բարտերային (ապրանքափոխանակման) սկզբունքով։ Այժմ, երբ սուբսիդավորվող ռուսական գազի հոսքը դադարեցվում է, իսկ եվրոպական «փրկօղակը» պատրանք է դուրս եկել, հանրապետությանը սպառնում է էներգետիկ իրական փլուզման վտանգը։ Ջերմաէլեկտրակայանները, որոնք ապահովում են երկրի էլեկտրաէներգիայի արտադրության կեսը, կարող են պարզապես կանգ առնել, եթե Երևանը շարունակի հակառուսական խաղեր վարել։

Խնդիրները, սակայն, երեկ չեն սկսվել։ Մայիսից ի վեր Մոսկվան սահմանափակել է հայկական տարբեր ապրանքների՝ հանքային ջրից և ծաղիկներից մինչև գինի, կոնյակ, բանջարեղեն, հատապտուղներ և ձուկ, ներկրումը պատճառաբանելով սանիտարական նորմերի համակարգային խախտումները։ Արդյունքը կանխատեսելի էր. տեղական շատ արտադրողների համար Ռուսաստանը ոչ միայն շուկա էր, այլ նաև եկամտի կենսական աղբյուր։ Օրինակ հայկական պանրի արտահանումը երկրին 16,4 միլիոն դոլարի եկամուտ էր բերել, որից մոտ 13,5 միլիոն դոլարը գոյացել էր ռուս գնորդներին կատարված վաճառքից։ Ռուսական մանրածախ առևտրի ցանցերում տեղ ունենալու հնարավորության կորուստը Երևանին կանգնեցնում է այդ ոլորտից ստացվող եկամտի ավելի քան 80%-ը կորցնելու վտանգի առաջ, և սա տնտեսության խոցելիության ընդամենը մեկ օրինակ է։

Նյութը հրապարակման պատրաստեց Կամո Խաչիկյանը

www.1or.am