Արտառոց դեպք՝ Արարատում, աշակերտը հարվածել է համադասարանցուն, իսկ հայրը հայհոյել է տուժածի մորը

Սեպտեմբերի 24-ին արտառոց դեպք է տեղի ունեցել Արարատի մարզում։ Ժամը 15։00-ի սահմաններում ՀՀ ներքին գործերի նախարարության ոստիկանության համայնքային ոստիկանության գլխավոր վարչության Արարատի բաժին է դիմել Արարատի մարզի բնակիչ 43-ամյա Անուշ Մ․-ն և հայտնել, որ գյուղերից մեկի միջնակարգ դպրոցի 6-րդ դասարանի աշակերտ 11-ամյա Ն․ Ղ․-ն վիճել և քաշ է տվել իր երեխային ու խաղացել նրա հայրիկի անվան հետ։

Ինչպես հայտնում է ֆոտոլրագրող Գագիկ Շամշյանը, մեկնել է ոստիկանության Արարատի բաժնի օպերատիվ խումբը՝ ավագ համայնքային ոստիկանի գլխավորությամբ, որտեղ պարզել են, որ սեպտեմբերի 24-ին՝ ժամը 14։00-ի սահմաններում, Անուշ Մ․-ի որդին՝ 10-ամյա Մ․ Գ․-ն, դպրոցից տուն վերադառնալու ճանապարհին է եղել, երբ համադասարանցի Ն․ Ղ․-ն վիճաբանել է նրա հետ, հրելով գցել գետնին և ոտքերով հարվածներ հասցրել մարմնի տարբեր մասերին, այնուհետև տվել սեռական բնույթի հայհոյանքներ՝ պատճառելով ֆիզիկական ցավ։

Գ․ Շամշյանի տեղեկություններով՝ կատարվածի վերաբերյալ Անուշ Մ․-ն դիմել է Ն․ Ղ․-ի հայրիկին՝ Արարատի մարզի բնակիչ 41-ամյա Ռոման Ղ․-ին, ով, պաշտպանելով իր երեխային, տվել է սեռական բնույթի հայհոյանքներ։

Դեպքի փաստով ոստիկանության Արարատի բաժնում փաստաթղթեր են կազմվել, որոնք փոխանցվել են ՀՀ քննչական կոմիտեի Արարատի մարզային քննչական վարչության Վեդիի քննչական բաժին։