Վաշինգտոնի եպիսկոպոսը, որը Թրամփին կոչ էր արել «գթասրտություն ցուցաբերել», հայտարարել է իր շուտափույթ հեռանալու մասին
ՄԻՋԱԶԳԱՅԻՆ
Վաշինգտոնի թեմի եպիսկոպոս Մարիանն Էդգար Բուդեն հայտարարել է, որ կլքի իր պաշտոնը 2028 թվականի հունիսի 3-ին՝ իր իրավահաջորդի ընտրությունից և ձեռնադրությունից հետո, գրում է The Guardian-ը։
Նա ղեկավարում է թեմը 2011 թվականից և դարձել է այս պաշտոնը զբաղեցրած առաջին կինը։
Իր որոշման մասին Բուդեն հայտնել է ծխականներին ուղղված նամակում։ Ըստ նրա, թեմի ղեկավարության և նախագահող եպիսկոպոսի գրասենյակի հետ խորհրդակցություններից հետո նա եկել է այն եզրակացության, որ ժամանակն է սկսել նախապատրաստվել հաջորդ առաջնորդի ընտրությանը։
Նոր եպիսկոպոսի ընտրությունները պետք է կայանան թեմական կոնվենցիայում 2028 թվականի հունվարի 29-ին, իսկ նրա օծումն ու ձեռնադրությունը նախատեսված են հունիսի 3-ին։ Հենց այդ օրն էլ կավարտվի Բուդեի ծառայությունը։
Բուդեն, որն այժմ 66 տարեկան է, լայն ճանաչում ստացավ 2025 թվականի հունվարին՝ Վաշինգտոնում Ազգային աղոթքի արարողության ժամանակ ունեցած քարոզից հետո, որը տեղի ունեցավ Դոնալդ Թրամփի երկրորդ երդմնակալության հաջորդ օրը։ Նա ԱՄՆ նախագահին կոչ արեց «գթասրտություն ցուցաբերել» միգրանտների և ԼԳԲՏ համայնքի ներկայացուցիչների, այդ թվում՝ երեխաների հանդեպ, որոնք, ըստ նրա, վախենում են իրենց կյանքի համար։
Թրամփը կտրուկ արձագանքեց ելույթին և Բուդեից ու եկեղեցուց ներողություն պահանջեց։ Նա նրա խոսքն անվանեց անտեղի և հայտարարեց, որ եպիսկոպոսը «իր աշխատանքը այնքան էլ լավ չի կատարում»։
Սա Բուդեի առաջին հրապարակային հակամարտությունը չէր Թրամփի հետ։ Վերջինիս առաջին նախագահական ժամկետի ընթացքում նա հանդես եկավ նախագահի կողմից կրոնական խորհրդանիշների օգտագործման դեմ, այն բանից հետո, երբ Թրամփը լուսանկարվել էր Աստվածաշնչով Վաշինգտոնում Սուրբ Հովհաննեսի եկեղեցու մոտ՝ Ջորջ Ֆլոյդի սպանությունից հետո տեղի ունեցած բողոքի ակցիաների ֆոնին։
Սակայն իր ներկայիս նամակում Բուդեն հեռանալու որոշումը չի կապում քաղաքական տարաձայնությունների հետ։ Նա հայտարարել է, որ մտադիր է թեմի աշխատակիցների և ղեկավար մարմինների հետ միասին նոր ղեկավարությանը հնարավորինս ուժեղ և կայուն անցում ապահովել։
Բուդեի իրավահաջորդը կդառնա Վաշինգտոնի թեմի տասներորդ եպիսկոպոսը։
