Երեխաների մահ և հարվածներ «Օզոնի» կենտրոններին. ԱԹՍ-ների հարձակման հետևանքները ՌԴ-ում

Այս գիշեր Ռուսաստանի միանգամից մի քանի տարածաշրջաններ ԱԹՍ–ների գրոհների են ենթարկվել։ Առավել ծանր հետևանքներ են գրանցվել Կրասնոդարում, որտեղ ԱԹՍ-ի բեկորներն ընկել են մասնավոր մանկական կենտրոնի վրա, 2 երեխա զոհվել է, ևս 7-ը` վնասվածքներ ստացել, երկու մեծահասակ հոսպիտալացվել է:

Անօդաչուների բեկորներ են ընկել Կրասնոդարի Պրիկուբանսկի օկրուգի մի քանի հասցեներում։ Միաժամանակ հարձակման է ենթարկվել «Օզոն» լոգիստիկ կենտրոնը։ Բեկորների ընկնելուց հետո օբյեկտի տարածքում խոշոր հրդեհ է բռնկվել։ Աշխատակիցներին հասցրել են տարհանել, նախնական տվյալներով` տուժածներ չկան։ Պահեստի աշխատանքը դադարեցվել է, տեղում աշխատում են արտակարգ ծառայությունները:

Հարձակման են ենթարկվել նաև ընկերության այլ լոգիստիկ օբյեկտներ։ Մախաչկալայում ժամը 05:00-ի սահմաններում անօդաչու թռչող սարքը հարձակվել է «Օզոնի» կենտրոնի վրա, ինչից հետո այնտեղ նույնպես հրդեհ է բռնկվել: Աշխատակիցներին տարհանել են, բայց մի քանի մարդ տուժել է։ Ընկերության տվյալներով՝ նրանց զննել են բժիշկները, կյանքին և առողջությանը վտանգ չի սպառնում։ Օբյեկտի աշխատանքը դադարեցված է:

Բացի այդ, Դաղստանի Կումտորկալինսկի շրջանում ԱԹՍ-ի բեկորների ընկնելու հետևանքով վնասվել է ենթակառուցվածքային օբյեկտ, հրդեհվել են պահեստային տարածքներ: Տուժածներ չկան:

Անօդաչուների վտանգի ֆոնին տարհանվել են նաև Ադիգեյսկում և Նևիննոմիսկում գտնվող «Օզոնի» պահեստների աշխատակիցները: Մարդիկ չեն տուժել, օբյեկտներն ու ներսում գտնվող ապրանքները չեն վնասվել։ Պահեստների աշխատանքը ժամանակավորապես դադարեցվել է արտակարգ ծառայությունների միջոցառումների ժամանակ:

Հիշեցնենք, որ մեկ օր առաջ անօդաչուները հարձակվել էին ընկերության` Օրենբուրգի մարզում գտնվող կենտրոնի վրա, որտեղից տարհանվել էր ավելի քան 300 մարդ, իսկ օգոստոսի 22-ին հարված էր հասցվել Սամարայի մարզում գտնվող օբյեկտին:

Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։

Մարտական գործողություններն ընթանում են մինչ օրս։

Ուկրաինական զորքը տարբեր եղանակներով (այդ թվում` ԱԹՍ–ներով) պարբերաբար գնդակոծում և գրոհում է ՌԴ սահմանամերձ շրջանները, մասնավորապես` Բելգորոդի, Բրյանսկի, Կուրսկի և Վորոնեժի մարզերը։