ՀՀ իշխանություններին պետք չէ «դիվերսիֆիկացիա» բառի ետևում թաքցնել շրջադարձը դեպի ՌԴ-ին թշնամաբար տրամադրված ԵՄ․ ՌԴ ԱԳՆ

Հայաստանի իշխանությունները «դիվերսիֆիկացիա» բառի ետևում թաքցնում են շրջադարձը եվրասիական ինտեգրումից և Ռուսաստանից դեպի թշնամաբար տրամադրված Եվրոպական միություն։ Այս մասին հայտարարել է Ռուսաստանի ԱԳՆ Տեղեկատվության և մամուլի դեպարտամենտի փոխտնօրեն Ալեքսեյ Ֆադեևը, հայտնում է ՌԻԱ Նովոստի-ն։

«Պետք չէ հասկացությունները փոխարինել, որովհետև, եթե «դիվերսիֆիկացիա» գեղեցիկ բառի ետևում թաքցվի շրջադարձը եվրասիական ինտեգրումից և ավանդական դաշնակցից դեպի, ըստ էության, Ռուսաստանին բացահայտ թշնամաբար տրամադրված Եվրոպական միություն, որը լրջորեն քննարկում է Ռուսաստանի հետ ուղղակի բախման հնարավորությունը, ապա այստեղ, ըստ էության, հետևությունն ակնհայտ է», - ճեպազրույցի ժամանակ ասել է Ֆադեևը՝ մեկնաբանելով Հայաստանի ղեկավարության վերջին հայտարարությունները։

Նա դա անվանել է բացահայտ խաբեություն նախ միայն եվրասիական ինտեգրման գործընկերների, այլև հենց Հայաստանի բնակչության նկատմամբ. Ֆադեևի խոսքով՝ դեպի Եվրոպա նման «թռիչքի» սոցիալ-տնտեսական հետևանքները թաքցվում են հայ քաղաքացիներից, իսկ արտահանման հետ կապված ընթացիկ դժվարությունները ներկայացվում են որպես Մոսկվայի ինչ-որ սահմանափակումներ։

«Սրանք մեր սահմանափակումները չեն, սա այն իրականությունն է, որն սպասում է հանրապետությանը ավանդական կապերի խզման դեպքում», - ընդգծել է դիվանագետը։

Ֆադեևը հավելել է, որ Երևանի կողմից Արևմուտքի երկրների հետ փոխգործակցության մասին ստորագրված հռչակագրերը իրավաբանորեն պարտադիր չեն, ի տարբերություն ռուս-հայկական պայմանագրերի և համաձայնագրերի զանգվածի։

Նա հիշեցրել է, որ դեռևս 2024 թվականին ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը «Հայաստանի բարեկամներ» ցանցի զեկույցում «սևով սպիտակի վրա» նշում էր, որ հանրապետությունը Արևմուտքի համար «ցածր ծախսատարությամբ ձեռնարկություն» է։