Դիեգո Ֆորլանը կգլխավորի Ուրուգվայի ազգային հավաքականը
ՍՊՈՐՏ
Ուրուգվայի ֆուտբոլի ասոցիացիայի (AUF) նախագահ Իգնասիո Ալոնսոն հաստատել է, որ ընտրանու նախկին հարձակվող Դիեգո Ֆորլանը ժամանակավորապես կստանձնի ազգային թիմի գլխավոր մարզչի պաշտոնը։ Լեգենդար ֆուտբոլիստը կղեկավարի հավաքականը մինչև հաջորդ տարվա մարտ ամիսը՝ զուգահեռաբար աշխատելով նաև համապատասխան տարիքային խմբի երիտասարդական թիմի հետ։
Ասոցիացիայում սպասվող ընտրություններից հետո միայն հստակ կդառնա, թե ինչ ուղղությամբ կընթանան մշտական գլխավոր մարզիչ փնտրելու աշխատանքները։
«Ասոցիացիայի գործկոմն իր ընտրությունը կանգնեցրել է Դիեգոյի վրա։ Մենք նրա հետ հանդիպել էինք դեռ տարիներ առաջ՝ այս նախագծում ներգրավելու համար։ Նա լի է էնտուզիազմով»,- Ալոնսոյի խոսքերն է մեջբերում Marca պարբերականը։
Այսպիսով, Ֆորլանը կգլխավորի Ուրուգվայի հիմնական թիմը աշնանային խաղերում, իսկ երիտասարդական ընտրանու հետ կմասնակցի հաջորդ տարվա հունվարին նախատեսված Ամերիկայի գավաթի խաղարկությանը։
Դիեգո Ֆորլանը Ուրուգվայի հավաքականի կազմում հանդես է եկել շուրջ 12 տարի՝ անցկացնելով 112 հանդիպում և դառնալով 36 գոլի հեղինակ։ Նա ճանաչվել է Հարավաֆրիկյան Հանրապետությունում կայացած աշխարհի առաջնության լավագույն ֆուտբոլիստ և երկու անգամ արժանացել «Ոսկե խաղակոշիկ» մրցանակին՝ որպես եվրոպական առաջնությունների լավագույն ռմբարկու։ Խաղացողի կարիերան ավարտելուց հետո Ֆորլանը որպես գլխավոր մարզիչ ուժերն է փորձել մի շարք ակումբներում, այդ թվում՝ «Պենյարոլում»։
