Ֆոն դեր Լայենը կարող էր բարեփոխում նախաձեռնել Կալասի հետ ունեցած հակամարտnւթյան պատճառով. Euronews

Եվրոպական արտաքին գործողությունների ծառայության (EEAS) բարեփոխման վերաբերյալ Ֆրանսիայի վերջին առաջարկը կարող է լինել Եվրահանձնաժողովի նախագահ Ուրսուլա ֆոն դեր Լայենի նախաձեռնությունը՝ ԵՄ դիվանագիտական ծառայության ղեկավար Կայա Կալասի հետ հարաբերություններում աճող լարվածության պատճառով։ Այս մասին հայտնել է Euronews հեռուստաալիքը՝ հղում անելով Բրյուսելում իր աղբյուրներին, հայտնում է ՏԱՍՍ-ը։

Շատ եվրոպացի դիվանագետներ կարծում են, որ եվրոպական արտաքին քաղաքական գերատեսչության բարեփոխման շուրջ բարձրացած աղմկահարույց սկանդալը, ամենայն հավանականությամբ, պայմանավորված է ներգերատեսչական երկպառակություններով, նշել է հեռուստաալիքը։

Պնդվում է, որ բրյուսելյան պաշտոնյաները ֆոն դեր Լայենին տեսնում են նաև որպես ինքնահռչակ աշխարհաքաղաքական խաղացողի, ով արտահայտվում է դաշինքի արտաքին քաղաքականությանը վերաբերող բազմաթիվ թեմաների շուրջ՝ դրանով իսկ խարխլելով Կալասի դիրքերը։ Ուստի այն ենթադրությունը, որ իրականում առաջարկվող բարեփոխումը կհանգեցնի դրա ներկայիս ղեկավարին լիազորություններից զրկելուն, ֆոն դեր Լայենի կողմից EEAS-ի դերը ճնշելու համոզիչ ռազմավարություն է, եզրափակել է Euronews-ը։

Ավելի վաղ Reuters գործակալությունը, հղում անելով մի փաստաթղթի, հայտնել էր, որ Ֆրանսիան Բրյուսելին առաջարկել է ուժեղացնել ԵՄ դիվանագիտական ծառայության և դրա ղեկավար Կալասի դերը։ Միևնույն ժամանակ, Financial Times թերթը հայտնել էր, որ եվրոպական երկրները դիտարկում են Կալասին և նրա 1 միլիարդ եվրո բյուջեով բաժնին լիազորություններից զրկելու հնարավորությունը՝ EEAS-ի գործառույթները Եվրամիության անդամ երկրներին փոխանցելու նպատակով։