Նեթանյահուն Սպիտակ տան մոտ տեղի ունեցած վերջին հրաձգությունը Թրամփի դեմ «մահափորձ» է անվանել

Իսրայելի վարչապետ Բենիամին Նեթանյահուն Սպիտակ տան մոտ տեղի ունեցած վերջին հրաձգությունը Դոնալդ Թրամփի դեմ «մահափորձ» է անվանել։ «Ուրախ եմ, որ նախագահ Դոնալդ Թրամփը՝ Իսրայելի լավագույն ընկերը, որ երբևէ եղել է Սպիտակ տանը, անվտանգ է, և որ հարձակվողը վնասազերծվել է մինչև որևէ հետագա վնաս հասցնելը։

Քաղաքական բռնությունը, այդ թվում՝ նախագահ Թրամփի դեմ սպանության բազմակի փորձերը, պետք է միանշանակ և վճռականորեն դատապարտվեն բոլորի կողմից», - գրել է Նեթանյահուն X սոցիալական ցանցում։

Հիշեցնենք, որ մի քանի ժամ առաջ 21-ամյա Նասիր Բեսթը կրակ էր բացել Սպիտակ տան մոտ ԱՄՆ Գաղտնի ծառայության անցակետում։ Բեսթը գնդակահարվել է։

Աղբյուրի համաձայն, Բեսթը դեռևս 2025 թվականի հուլիսին արդեն բախում էր ունեցել Գաղտնի ծառայության հետ, երբ փորձել էր ներթափանցել Սպիտակ տուն, ձերբակալվել էր և հոգեկան առողջության խնդիրների պատճառով տեղափոխվել հոգեբուժական բաժանմունք։

Միևնույն ժամանակ ո՛չ ամերիկյան ԶԼՄ-ները, ո՛չ էլ անձամբ Դոնալդ Թրամփը տեղի ունեցածը ԱՄՆ նախագահի դեմ սպանության փորձ չեն անվանել։