Ֆրանսիան Հունաստանին առաջարկել է Ուկրաինային Mirage կործանիչներ փոխանցելու համաձայնագիր․ «Le Parisien»
ՄԻՋԱԶԳԱՅԻՆ
Ֆրանսիան Հունաստանին առաջարկել է նախկինում վաճառված բոլոր «Mirage 2000» կործանիչներն Ուկրաինային փոխանցելու համաձայնագիր՝ Աթենքի կողմից ֆրանսիական Rafale ինքնաթիռների գնման զեղչի դիմաց, գրել է «Le Parisien»։
Առաջարկը գալիս է Dassault Aviation ընկերությունից, և նախատեսվում է, որ այն կներկայացնի Ֆրանսիայի նախագահ Էմանուել Մակրոնը ապրիլի 24-ին և 25-ին Հունաստան կատարելիք այցի ընթացքում։
Առաջարկի համաձայն՝ Հունաստանը կկարողանա փոխանակել իր 43 Mirage ինքնաթիռներից բաղկացած ինքնաթիռախումբը, այդ թվում՝ 24 «Mirage 2000-5» և 19 ավելի հին «Mirage 2000 EGM/BGM», նաև պահեստամասեր։
Այնուամենայնիվ, այս ինքնաթիռներից ոչ բոլորն են հավանաբար շահագործելի, քանի որ ավելի հին տարբերակներն արդեն դուրս են բերվել կիրառումից։
Ըստ լրատվամիջոցների հաղորդագրությունների՝ Ֆրանսիան առաջարկում է Հունաստանին մատակարարել «նման քանակությամբ» Rafale կործանիչներ՝ զեղչված գնով: Գործարքի կոնկրետ պայմանները և ճշգրիտ գինը կողմերը կճշտեն բանակցությունների ընթացքում։
«Le Parisien»-ը նշել է, որ Mirage կործանիչների Rafale-ներով փոխանակումը թույլ կտա Հունաստանի 114-րդ կործանիչ թևին ամբողջությամբ հագեցնել երկու էսկադրիլիա՝ ընդհանուր առմամբ 36 Rafale կործանիչներով:
