Մադրիդի «Ատլետիկոյի» գլխավոր մարզիչը մեկնաբանել է Իսպանիայի Գավաթի եզրափակչում «Ռեալ Սոսյեդադից» կրած պարտությունը

Մադրիդի «Ատլետիկոյի» գլխավոր մարզիչ Դիեգո Սիմեոնեն մեկնաբանել է Իսպանիայի Գավաթի եզրափակչում «Ռեալ Սոսյեդադից» կրած պարտությունը։ Հիշեցնենք, որ հանդիպման հիմնական և լրացուցիչ ժամանակն ավարտվել էր 2։2 հաշվով, իսկ հետխաղյա 11-մետրանոց հարվածաշարում բասկյան ակումբն առավելության էր հասել 4։3 հաշվով։

«Նախևառաջ ցանկանում եմ շնորհավորել մրցակցին։ Մենք լավ արձագանքեցինք բաց թողած առաջին գոլին, սակայն դրանից հետո խաղի տեմպն այնքան էլ բարձր չէր։ Ընդմիջմանը զրուցեցինք տղաների հետ, վերադասավորվեցինք և սկսեցինք խաղալ այնպես, ինչպես հարկավոր էր։

Կարող էինք խփել նաև երրորդ գոլը. Ջոնին ու Բաենան լավ պահեր ունեին։ Լրացուցիչ ժամանակում թիմերից յուրաքանչյուրն ուներ իր հնարավորությունը՝ Խուլիանի հարվածից հետո գնդակը դիպավ դարպասաձողին, իսկ Մուսոն տպավորիչ սեյվ գրանցեց։

Մենք շատ արժանապատիվ հանդիպում անցկացրինք, բայց, ցավոք, 11-մետրանոցների հարվածաշարում հաջողությունը նրանց կողմն էր։ Շնորհավորում եմ նրանց»,- արգենտինացի մասնագետի խոսքերն է մեջբերում Marca-ն։

Նշենք, որ այս հաղթանակը «Ռեալ Սոսյեդադի» համար չորրորդն էր Իսպանիայի Գավաթի պատմության մեջ։ Նախորդ տարի մրցաշարի հաղթող էր ճանաչվել կատալոնական «Բարսելոնան»։