Պուտինը Փաշինյանին. Հայաստանը չի կարողանա նստել երկու աթոռի վրա, Փաշինյան. Մի քիչ էլ կնստենք

Միաժամանակ Եվրամիության և Եվրասիական տնտեսական համագործակցության հետ մաքսային միության մեջ լինելը անհնար է, ուստի վաղ թե ուշ Հայաստանը ստիպված կլինի որոշում կայացնել։

Այս մասին հայտարարել է Ռուսաստանի նախագահ Վլադիմիր Պուտինը ՀՀ վարչապետ Նիկոլ Փաշինյանի հետ հանդիպման ժամանակ, գրում է politnavigator.news–ը։

«Մենք տեսնում ենք, որ Հայաստանը քննարկում է Եվրամիության հետ հարաբերությունների զարգացման հարցը, մենք լիովին հանգիստ ենք այդ կապակցությամբ: Մենք հասկանում ենք, որ ցանկացած երկիր ձգտում է առավելագույն օգուտ քաղել երրորդ երկրների հետ համագործակցությունից։ Բայց դա պետք է ակնհայտ լինի, դա պետք է անկեղծորեն ասվի, նախապես, ինչպես ասում են՝ «տեղում»։ Գտնվել մաքսային միության մեջ և՛ Եվրամիության, և՛ Եվրասիական տնտեսական համայնքի հետ անհնար է. դա պարզապես անհնար է ըստ էության: Եվ հարցը նույնիսկ քաղաքական չէ, այն զուտ տնտեսական է։ Որովհետև որոշ բաներ պահանջում են լայնածավալ համատեղ աշխատանք, որը պետք է իրականացվի տարիների ընթացքում: Դրանք ներառում են առանձին ապրանքային խմբերի գնահատման, այդ ապրանքային խմբերի շուկա մուտք գործելու և գյուղատնտեսական արտադրանքի բուսասանիտարական վերահսկողության տարբերությունները: Մենք ունենք բոլորովին տարբեր, շատ տարբեր բուսասանիտարական պահանջներ Ռուսաստանում և ԵՄ երկրներում։

Այսօր, այս պահին, կան նաև շատ այլ խնդիրներ: Հնարավոր է, որ տարիներ անց մենք՝ Եվրասիական տնտեսական միությունը և Եվրամիությունը, հուսով եմ վերջիվերջո այդպես էլ կլինի, չէ՞ որ մենք ապրում ենք նույն մայրցամաքում, կկարողանանք լուծել դրանք։

Բայց երբ, նույնիսկ ուկրաինական ճգնաժամից առաջ, մենք փորձում էինք համաձայնության գալ եվրոպացիների հետ համատեղ աշխատելու վերաբերյալ, ոչինչ չստացվեց։ Նրանք շատ կոշտ դիրքորոշում են ընդունում գործնականում յուրաքանչյուր հարցի շուրջ, նույնիսկ ամենափոքրերի, ինչպես ինձ թվում էր այն ժամանակ», - ասել է Պուտինը։

Իր հերթին Փաշինյանը ցանկություն է հայտնել շարունակել նստել երկու աթոռների վրա։ «Մենք գիտենք, որ երկու միավորումներին անդամակցությունը անհամատեղելի է։ Բայց առայժմ մեզ հաջողվել է համատեղել այս օրակարգերը։ Եվ քանի դեռ կարող ենք, մենք կշարունակենք դա անել։ Եվ երբ գործընթացները զարգանան այնքան, որ անհրաժեշտ լինի որոշում կայացնել, Հայաստանի քաղաքացիները կընդունեն այդ որոշումը։ Բայց մեր հարաբերությունները Ռուսաստանի հետ երբեք կասկածի տակ չեն դրվի, քանի որ այդ կապերը շատ խորն են», - շաղակարտել է Փաշինյանը։