Փաշինյանը ցուցադրում է իր վախերը «Ուժեղ Հայաստան» դաշինքից

Ընտրություններին դաշինքով գնալու՝ «Ուժեղ Հայաստան» կուսակցության հայտարարությունը լուրջ խուճապ է առաջացրել գործող իշխանությունների շարքերում։ Հիշեցնենք՝ նախօրեին կուսակցության խորհրդի անդամ Նարեկ Կարապետյանը տեսաուղերձ էր հրապարակել, հայտնել դաշինքի ստեղծման մասին և կոչ արել քաղաքական այլ ուժերին միանալու իրենց։ «Մեր ժողովուրդը մեզնից միասնականություն է ուզում, միասնականությունն է, որ կբերի ուժեղ խաղաղություն, կուժեղացնի մեր երկիրն ու մեր բաժանված ազգը։ Պառակտումների ժամանակաշրջանը պետք է մնա անցյալում»,– ասել է նա։

Կարապետյանի խոսքով՝ «Ուժեղ Հայաստանն» իր դռները բացում է բոլոր նոր ուժերի առջև, որոնք ցանկանում են միավորվել և փոխել Հայաստանի ընթացքը, ստեղծել ուժեղ Հայաստան։ «Մենք կստեղծենք դաշինք՝ «Ուժեղ Հայաստան Սամվել Կարապետյանի հետ»։ Միասին կկարողանանք արդարացնել մեր ժողովրդի սպասելիքները, լուծել մեր ազգի առջև ծառացած խնդիրները, որպեսզի 10–20 տարի անց հետ նայենք ու իմանանք, որ ճիշտ որոշում ենք կայացրել՝ պառակտմանը վերջ տալով։ Ի գործ»,– ընդգծել է գործարար, բարերար Սամվել Կարապետյանի եղբորորդին։

Այս հայտարարությունից հետո գործող իշխանությունները լծվել են «Ուժեղ Հայաստան» կուսակցությանը վարկաբեկելու գործին և, առաջին հերթին, փորձում են այս կուսակցությանը կապել նախկինների հետ։ Զուր չէ, որ հենց այսօր վաղ առավոտյան Փաշինյանը տեսաուղերձ է հղել՝ հայտարարել, թե միայն «Քաղպայմանագիրն» է խաղաղության կուսակցություն, իսկ մյուս բոլորը տանում են պատերազմի։ «Քոչարյան-Կարապետյան-Ծառուկյան եռագլուխ կուսակցությունը ընտրելը միանշանակ և աներկբա նշանակում է պատերազմ՝ սրանից բխող բոլոր հետևանքներով»,- հայտարարել է Նիկոլ Փաշինյանը։

Ընդ որում, մեկ կարճ ելույթում միախառնելով իշխանական բոլոր նարատիվները և դրանք փորձելով կապել «Ուժեղ Հայաստան» կուսակցության և Սամվել Կարապետյանի հետ, նախ՝ Կարապետյանին փորձում են այլ առաքելություն վերագրել, իբր իր ձայները փոխանցելու է երկրորդ նախագահ Ռոբերտ Քոչարյանին, ապա այդ նարատիվը չարաշահելով էլ հանրության մեջ ձգտում են նվազեցնել «Ուժեղ Հայաստանի» օրեցօր աճող հեղինակությունը։ Բնականաբար, հանրությունը հրաշալի հասկանում է գործող իշխանությունների այս մարտավարությունը, բայց և բնական է, որ որոշ զանգվածների իշխանություններին կհաջողվի մոլորեցնել, ուստի ընդդիմության թիվ մեկ խնդիրն է ամեն գնով կոտրել իշխանական փնթի նարատիվները։

Սոնա Գալստյան