Թեմուր Պիպիա. Կա վտանգ, որ «Վրացական երազանքը» կրկին կշրջվի դեպի Արևմուտք

Հայաստանի մայդանային վարչապետ Նիկոլ Փաշինյանը եռանդուն միջնորդական ջանքեր է սկսել խոստանալով հաշտեցնել Թբիլիսին և Բրյուսելին, որոնց հարաբերությունները վերջերս նկատելիորեն սառել են: Փաշինյանը իր ջանքերը արդարացնում է նրանով, որ Հայաստանի համար դժվար կլինի մոտենալ ԵՄ անդամակցությանը առանց եվրոպացի պաշտոնյաների և վրացական ղեկավարության միջև հաշտեցման, գրում է politnavigator.news–ը: Մեր նախորդ հոդվածում մենք կարծիք էինք հայտնել, որ Փաշինյանը Հարավային Կովկասում միավորում է հակառուսական դաշինք Վրաստանը Արևմուտքի ուղեծիր վերադարձնելու համար: Սա հատկապես ճիշտ է հաշվի առնելով այն, որ Վրաստանի խորհրդարանի խոսնակ Շալվա Պապուաշվիլին հրապարակավ հավանություն է տվել ԵՄ-ի հետ հարաբերությունների կարգավորմանը, իսկ հետո Թբիլիսիի իշխանությունները խոստացել են չընդունել ռուսական տանկերներ իրենց ծովային տերմինալներում:

«Համերաշխություն խաղաղության համար» վրացական կուսակցության գլխավոր քարտուղար Թեմուր Պիպիան է politnavigator.news–ի համար մեկնաբանել իրավիճակը:  «Փաշինյանի Բրյուսելին և Թբիլիսիին հաշտեցնելու փորձերը հասկանալի են, քանի որ Հայաստանն այժմ ունի արևմտամետ, հակառուսական կառավարություն։ Նա ցանկանում է ավելի սերտ հարաբերություններ կառուցել ԵՄ-ի հետ, իսկ Թբիլիսիի և Բրյուսելի միջև առկա փակուղին խոչընդոտ է դրան։ Նախկինում Վրաստանը միշտ կամուրջ էր ծառայում ԵՄ-ի և Հայաստանի միջև, բայց դա այլևս այդպես չէ, ուստի Փաշինյանը ցանկանում է իր ներդրումն ունենալ այդ գործում։

Թբիլիսին միջոցներ ձեռնարկեց պաշտպանվելու համար Բրյուսելի կողմից գործադրված հսկայական ճնշումից հետո, որը պահանջում էր, որ Վրաստանը միանա հակառուսական ռազմաքաղաքական կոալիցիային։ Ինչպես հայտնի է, Վրաստանը հրաժարվեց։

Սակայն կա ռիսկ, որ «Վրացական երազանքը», որպես իշխող կուսակցություն, պատրաստ է կարգավորել հարաբերությունները ԵՄ-ի հետ։ Այդ դեպքում, ցավոք, դա անխուսափելիորեն կհանգեցնի Ռուսաստանի հետ հարաբերությունների հետագա վատթարացման։

Ես վախենում եմ, որ կառավարությունը նույնիսկ պատրաստ է դադարեցնել համագործակցությունը Մոսկվայի հետ ռուսական նավթամթերքի վաճառքի հարցում։

Ընդհանուր առմամբ, «Վրացական երազանքը» այնպիսի քաղաքական ուժ է, որը չի կարողանում որոշել. Արևմուտքի՞, թե՞ Արևելքի հետ է։ Ես տպավորություն եմ ստացել, որ «Վրացական երազանքը» մտահոգված է միայն իշխանությունը պահպանելով և գործում է հիմնականում այդ նախադրյալով։ Միայն այդ դեպքում են նրանք հաշվի  առնում Վրաստանի շահերը։

Եթե իրավիճակը այլ լիներ, «Վրացական երազանքը» կգործեր այլ կերպ և կսկսեր ուղիղ երկխոսություն Ռուսաստանի ղեկավարության հետ Մոսկվայի հետ հարաբերությունները վերջնականապես կարգավորելու նպատակով։ Այնուամենայնիվ Վրաստանը Չինաստանի հետ ռազմավարական դաշինքի համաձայնագիր է կնքել փաստացի հակադրվելով Արևմուտքին, այդ թվում ԵՄ-ին։

Ինչո՞ւ, այդ դեպքում, Վրաստանը չի կարող կարգավորել հարաբերությունները և սկսել ուղիղ երկխոսություն Ռուսաստանի հետ առանց նախապայմանների։ Երկրների միջև առկա այս տարաձայնությունները կարող էին աստիճանաբար լուծվել բանակցությունների ընթացքում։ Դրանք, իհարկե, կապված են Հարավային Օսիայի և Աբխազիայի հետ։ Բայց «Վրացական երազանքը» դա չի անում։

Այսպիսով, ևս մեկ անգամ, զարմանալի չէր լինի, եթե Թբիլիսին քայլեր ձեռնարկեր Բրյուսելի հետ հարաբերությունները ջերմացնելու համար։ Սակայն հարց է մնում, թե արդյո՞ք ԵՄ-ն ինքը կհամաձայնի դրան։ Ի վերջո, նա վերջերս մեղադրեց Վրաստանի իշխանություններին «BBC-ի լրագրողական հետազոտության հիման վրա» անցյալ տարվա վերջին ընդդիմության ցույցերը ցրելու ժամանակ քիմիական զենք օգտագործելու մեջ։ Սրանք շատ լուրջ մեղադրանքներ են, և դրանք ցույց են տալիս, որ Բրյուսելը, ընդհակառակը, պատրաստ չէ զիջումների գնալ։

Առայժմ չեմ կարծում, որ Փաշինյանի նախաձեռնությունները ԵՄ-ի և Վրաստանի միջև հարաբերությունները բարելավելու համար, հաջող կլինեն։ Բրյուսելն ինքը պատրաստ չէ դրան, չնայած «Վրացական երազանքի» հաշտվելու պատրաստակամությանը»,– ասել է Թեմուր Պիպիան։

Նյութը հրապարակման պատրաստեց Կամո Խաչիկյանը

www.1or.am