Ինչ հորմոնալ փոփոխություններ են տեղի ունենում կանանց օրգանիզմում ճարպակալման դեպքում

Ճարպակալումը ներկայում ամենատարածված խնդիրներից մեկն է: Կյանքի արագ ռիթմը, ամեն ինչ հասցնելու և հաջողության հասնելու մոլուցքը ստիպում են մարդկանց մոռանալ առողջ քնի, հանգստի և սննդի մասին: Անառողջ սնունդն ու նստակյաց կենսակերպը հանգեցնում են բնակչության շրջանում ճարպակալումից տառապող մարդկանց թվի կտրուկ աճին, մինչդեռ ավելորդ քաշն, իր հերթին, կարող է նպաստել առողջական բազմաթիվ խնդիրների առաջացմանը:

Ինչու է ճարպակալման դեպքում մարդու օրգանիզմում փոխվում վերարտադրողական հորմոնների մակարդակը

Ճարպակալումը գրեթե միշտ ուղեկցվում է էնդոկրին համակարգի աշխատանքի խանգարումներով: Ընդ որում՝ ճարպակալումը պայմանավորված է լինում էնդոկրին համակարգի աշխատանքի խանգարումներով, սակայն միևնույն ժամանակ ավելորդ քաշն ազդում է այդ ախտաբանությունների արտահայտվածության վրա: Բացի այդ, ճարպակալման դեպքում փոփոխվում է նաև կանանց օրգանիզմում սեռական հորմոնների, հատկապես՝ էստրոգենի մակարդակը: Նման կանանց մոտ վերարտադրողական գործառույթը ոչ միշտ է խանգարված լինում, սակայն զգալիորեն բարձրանում է սրտանոթային հիվանդությունների և նյութափոխանակության հետ կախված1 ախտաբանությունների առաջացման հավանականությունը:

Անդրոգեն հորմոնների մակարդակը ճարպակալման դեպքում

Ճարպակալման դեպքում կանանց վերարտադրողական հորմոնների մակարդակի փոփոխությունն անվանվում է ֆունկցիոնալ հիպերանդրոգենիա: Դաշտանային ցիկլի խանգարումներով ուղեկցվող ճարպակալման դեպքում կանանց օրգանիզմում զգալիորեն բարձրանում է անդրոգեն հորմոնների մակարդակը: Ընդ որում՝ անդրոգեն հորմոնների արտադրման արագությունը կարող է տարբեր լինել՝ կախված ճարպակալման տեսակից: Օրինակ՝ որովայնախոռոչային (վիսցերալ) ճարպակալման դեպքում զգալիորեն բարձր է լինում տեստոստերոնի մակարդակը:

Ինչպես է փոփոխվում էստրոգենի մակարդակը ճարպակալման դեպքում

Ճարպակալման դեպքում փոփոխվում է նաև Էստրոգենի՝ կանանց օրգանիզմում գլխավոր հորմոնի մակարդակը: Հիպերէստրոգենիայի զարգացման հարցում կարևոր նշանակություն ունի նաև սեռական հորմոնները կապող գլոբուլինի մակարդակի նվազումն ու էստրոգենների փոխանակության խանգարումը, ինչը հանգեցնում է օրգանիզմում դրա կենսաբանորեն ակտիվ ֆրակցիաների մակարդակի բարձրացմանը: Ճարպակալումից տառապող կանանց օրգանիզմում էստրոնի մակարդակը, ի տարբերություն էստրադիոլի, բարձրանում է և հենց այս պատճառով խանգարվում է օրգանիզմում հակադարձ կապի մեխանիզմի նորմալ աշխատանքը:

Ինչու է ճարպակալման դեպքում նվազում սեռական հորմոնները կապող գլոբուլինի մակարդակը

Սեռական հորմոնները կապող գլոբուլինը գլիկոպրոտեին է, որի մակարդակը կախված է կնոջ մարմնի զանգվածից. որքան մեծ է մարմնի զանգվածը, այնքան ցածր է սեռական հորմոնները կապող գլոբուլինի մակարդակը և հակառակը: Սակայն հարկ է հիշել, որ դրա մակարդակի վրա ազդումն է նաև ճարպակալման տեսակը:

Բացի այդ, օրգանիզմում սեռական հորմոնները կապող գլոբուլինի մակարդակի նվազման հարցում առանցքային նշանակություն ունի նաև ինսուլինը, որն արգելակում է գլիկոպրոտեինի սինթեզը լյարդի բջիջներում:

Նյութի աղբյուրը՝ estet-portal.com