«Ժողովրդավարության բաստիոնում» չեն հավատում, որ քաղբանտարկյալներ չկան

Նիկոլ Փաշինյանի պաշտոնավարման ողջ ընթացքում գործող իշխանությունները փորձել են համոզել, թե Հայաստանում քաղբանտարկյալներ չկան։ «Ժողովրդավարական բաստիոնի» անվան տակ Փաշինյանն անընդհատ և ոչ միայն 44-օրյա պատերազմից հետո բռնաճնշումներ է իրականացրել քաղաքական ընդդիմախոսների նկատմամբ՝ այդ ամենը համեմելով քրեական սոուսներով։ Այդուհանդերձ, հասարակությունը վստահ է, որ Հայաստանում կան քաղբանտարկյալներ, իսկ այս տարվա հարցումները փաստում են, որ հասարակության գերակշիռ մեծամասնությունն այդպես է մտածում։

«Gallup International Association»-ի հայաստանյան ներկայացուցչությունը հարցումներ էր անցկացրել, և այս տարի ամենաբարձր դրական պատասխանն է ստացվել․ հարցվածների 62 տոկոսը «այո» է պատասխանել «Արդյոք Հայաստանում կա՞ն քաղբանտարկյալներ» հարցին։ «Ոչ» պատասխանել է միայն 18 տոկոսը, իսկ 20 տոկոսը դժվարացել է պատասխանել։ Ընդ որում՝ հարցվածների մեծ մասը՝ 71․5 տոկոսը, քաղբանտարկյալ է համարում բարերար, գործարար Սամվել Կարապետյանին։ Երկրորդ տեղում Բագրատ Սրբազանն է՝ 38․5 տոկոսով, 3-րդ տեղում՝ Շիրակի թեմի առաջնորդ Միքայել արքեպիսկոպոս Աջապահյանը՝ 37․8 տոկոսով, իսկ Արմեն Աշոտյանը ստացել է 9․6 տոկոս։

Քաղաքացիների 64․4 տոկոսն էլ բացասական է գնահատում Սամվել Կարապետյանի կալանավորումը։ Փաստացի՝ որքան էլ գործող իշխանությունները փորձում են հանրությանը համոզել, թե Կարապետյանը և մյուս կալանավորվածները քրեական ինչ-որ հանցագործություններ են նախապատրաստել՝ ընդհուպ հեղաշրջման կոչեր անելով կամ հեղաշրջում նախապատրաստելով, փաստն այն է, որ հայ հասարակությունը սկսել է ողջ թափով գիտակցել, թե ուր է տանում Նիկոլ Փաշինյանի կառավարության քաղաքականությունը։ Այս առումով ակնհայտ է, որ Փաշինյանի քարոզչական նարատիվները ձախողվել են հայ հասարակության մոտ, իսկ խորհրդարանական ընտրություններին ընդառաջ նման զարգացումը խիստ մտահոգիչ պետք է լինի Նիկոլ Փաշինյանի և իր թիմի համար։

Էլինա Ասատրյան