Ինչու են տղամարդիկ օգտվում մարմնավաճառներից

Bravo.am/Չընկղմվեմ մարմնավաճառների հոգեկծիկի մեջ: Նրանք կան ու կլինեն, քանի կա նրանց նկատմամբ պահանջարկ: Ավելի հետաքրքրաշարժ է հասկանալ, թե ովքեր ու ինչու են օգտվում նրանց մեխանիկական ու անգիր արած գործողություններից: Ինչպես միշտ, խմբավորենք մեր սիրելի տղամարդկանց. առանց դրա հնարավոր չէ նրանց հախից գալ:


Լուսի Քոչարյանը

ՉԱՄՈՒՍՆԱՑԱԾՆԵՐ. Որքան անճար պետք է լինել սեքսը գնելու համար: Ինչն է շատ այս աշխարհում` սեքսը: Գտնել մեկին, ում դու ես ցանկանում, եւ ով քեզ կցանկանա. ինչպես կարելի է դրա համար գումար տալ` չգիտեմ: Գումար տալ, որ մարմնավաճառը էմոցիաներն անջատած մի քանի բան անի: Բայց հաջորդ պահին շարվում են տրամաբանական պատճառներ, որոնք անխուսափելի են:

 * Դարի խնդիրը՝ կուսություն. Հանդիպում են տղան եւ աղջիկը, սիրահարվում, սկսում ընկերություն անել, որոշում ամուսնանալ… 3 տարուց: Որոշում են նաեւ կուսություն պահպանել… 3 տարի: Եվ այստեղ սկսվում է կրկեսը: Մեջբերեմ. «Դե, ընկերուհիս միայն մարմնավաճառին ա համաձայն. չի խանդում ու չի բաժանվի, միայն եթե մարմնավաճառի հետ անեմ սեքս»: Ահա եւ մարմնավաճառություն սպառողների առաջին հոծ զանգվածը:

*Հմայքի ու ֆլիրտի պակաս. Միգուցե սրված, բայց մի դեպք նկարագրեմ: 30-ի շուրջ, հաստափորիկ, կոտրտված ռուսերենով անշուք տղամարդիկ ճոխ սեղան էին գցել երկարոտն գեղեցկուհիների համար եւ ամենաանտաղանդ ձեւով փորձում էին զբաղեցնել նրանց: Գեղեցկուհիները ուտում, պարում, ուրախանում էին` մեկ-մեկ ուշադրության ու ժպիտի կտորիկներ պարգեւելով հաստլիկներին: Խարիզմատիկ ու մշտապես աղջիկների ուշադրության մեջ լող տվող ընկերոջս զարմանքս եմ արտահայտում. «Մի՞թե էս ամենը մի հատիկ սեքսի համար ա»: Ընկերս քմծիծաղով. «Էէէ, Լուս, հո միամիտ չես: Էս աղջիկները թույլ չեն տալու մատով դիպչել իրենց: Տղեքը գնալու են մարմնավաճառների մոտ: Իսկ աղջիկները բացարձակ անվճար ու երկուստեք հաճելի սեքսով են զբաղվելու ֆլիրտից բան հասկացող, ինքնավստահ հմայիչների հետ: Էդքան բան»:

*Սեքս գնելու բարդույթ. Սթիվ ՄքՔուինի «Ամոթ» (Shame) ֆիլմում Ֆասբենդերի կերպարը հենց այս բարդույթն ուներ. նա չէր կարողանում սեքսով զբաղվել սովորական կանանց հետ: Սա կարող է հոգեբանական լուրջ բարդույթի արդյունք լինել. «արժանի չեմ անվճար սեքսի, ստիպված պետք է գնեմ այն»:

ԱՄՈՒՍՆԱՑԱԾՆԵՐ. Դժբախտ ամուսնացածներին չդիտարկենք, քանզի, վասնզի տրամաբանությունն ակնհայտ է: Իսկ ի՞նչն է ստիպում մարմնավաճառի այցելել տղամարդուն, ով ունի կին, սիրում է նրան ու հարաբերականորեն երջանիկ է: Առեղծվա՞ծ: Ոչ, գրողը տանի, ի՞նչ առեղծված: Ինձ հաջողվեց իրական լուսաբանումներ հայթայթել հենց իրենցից` տղամարդկանցից, ինչպես նաեւ աշխատեցնել սեփական երեւակայությունս:

*Քառակուսի սեքս. Տղամարդ, 28տ.. «Կնոջս սիրում եմ, երբեք չեմ բաժանվի, բայց… սեքսում ամեն ինչ կարելի ա, բացի մի շարք դիրքերից, փեթինգներից, օրալ ու անալ սեքսից: Այսինքն, գրեթե բան չի կարելի: Սովորական աղջկա հետ չեմ ուզում. դավաճանություն կստացվի: Մնում ա վճարովի սեքսը»: 

*Էգոիզմի ցուցաբերում. Տղամարդ, 24տ.. «Կնոջս հետ եմ ուզում լինել միշտ, բայց իր հետ սեքսի ընթացքում մի քիչ լարված եմ. անընդհատ մտածում եմ, որ իրեն լավ լինի, ինքը հաճույք ստանա: Իսկ ես մնում եմ երկրորդ պլանում: Մեկ-մեկ գնում եմ մի շատ մտերիմ մարմնավաճառուհու մոտ ու ուղեղս անջատած անում էն, ինչ ուզում եմ՝ հանգիստ, դինջ»: 

*Կիսասոված վիճակում. Տղամարդ, 30տ.. «Կինս սեքսի կարիք ունի շաբաթը մեկից ոչ հաճախ, իսկ ես` ամեն օր: Ինչ անեմ, հո չեմ բաժանվելու դրա պատճառով: Որոշ գումար հատկացնում եմ լրացուցիչ սեքսին` առանց ընտանեկան բյուջեին վնասելու: Հակառակ դեպքում շատ նյարդային եմ լինում»:

*Ստանդարտից շեղումներ. Հնարավո՞ր է, որ ամուսնացած (հայ) տղամարդու մոտ ընդունված նորմայից դուրս սեքսուալ պահանջմունքներ լինեն, օրինակ՝ ֆետիշիզմի, սադոմազոխիզմի, բիսեքսուալիզմի դաշտից: Շատ ավելի հավանական է, քան կարող ենք մոտավորապես պատկերացնել: Իսկ այս ամենը հանգիստ կարելի է գնել: 

*Սեքսուալ երեւակայություն. Ո՞րն է տղամարդու ամենավառ սեքսուալ երեւակայությունն ըստ վիճակագրության: Ճիշտ է՝ սեքսը 2 (եւ ավել՝ ըստ ախորժակի ու հնարավորությունների) կանանց հետ: Իսկ քանի՞ օրինական կին է համաձայն մեկ այլ իգականի ավելացնել ընտանեկան անկողին: Մմմմ: Նո քոմենթ:

Օհ, չմոռանամ նաեւ ամենահետաքրքիր պատասխանները ներկայացնել 200 հոգանոց հարցումիցս: Հասարակությանը պե՞տք են մարմնավաճառներ: 

«Թող լինեն, թե չէ բռնաբարության դեպքերը կշատանան: Միայն թե հարկվող ու ստերիլ պայմաններով»: «Պետք են: Հարբած, ագրեսիվ անհաջողակների մաղձն ու ծեծն առաջինն իրենց վրա իրենք են վերցնում»: «Պետք են, եթե անվտանգ մաքուր, էսթետիկ լինեն»: «Պետք են, քանզի մեկ-մեկ, երբ մենք պարապ ենք մնում կամ զզվում ենք ամեն ինչից, գնում ենք իրենց մոտ»: «Նրանց կարիքը չի լինի, եթե հասարակությունը նորմալ ու առողջ բան համարի սեքսը»: «Պետք են, բայց  օրինական հասարակաց տների տեսքով, ինչպես որոշ երկրներում»: «Պետք են, քանի որ մեր երիտասարդների համար մշտական զուգընկերուհի ունենալն ավելի թանկ հաճույք է, անգամ՝ շքեղություն»:

Այսքանից հետո մնում է քաջ առողջություն մաղթել մարմնավաճառներին եւ լավատեսություն օրինական կանանց: