Լավրովը շնորհակալություն է հայտնել Կիմ Չեն Ընին Կուրսկի մարզի ազատագրման գործում ցուցաբերած օգնության համար

Ռուսաստանի արտաքին գործերի նախարար Սերգեյ Լավրովը Վոնսանում կայացած հանդիպման ժամանակ շնորհակալություն է հայտնել Կորեայի Ժողովրդա-Դեմոկրատական Հանրապետության (ԿԺԴՀ) ղեկավար Կիմ Չեն Ընին Կուրսկի շրջանի ազատագրմանը Հյուսիսային Կորեայի զորքերի մասնակցության համար: Այս մասին ըստ RBC-ի հաղորդել է Ռուսաստանի արտաքին գործերի նախարարության մամուլի ծառայությունը։

Հիշեցնենք, որ ապրիլին Ռուսաստանի գլխավոր շտաբի պետը հաստատեց, որ հյուսիսկորեացի զինվորներ են մասնակցել Կուրսկի շրջանում ընթացող մարտական գործողություններին: Այս մասին նախկինում հաղորդել էին արևմտյան և ուկրաինական աղբյուրները։ Փհենյանը զինվորներ է ուղարկել Համապարփակ ռազմավարական գործընկերության պայմանագրի համաձայն։

ԿԺԴՀ-ն և Ռուսաստանը այն ստորագրել են անցյալ տարի, և այն ուժի մեջ է մտել դեկտեմբերին։ Հոդված 4-ի համաձայն՝ «եթե կողմերից մեկը հայտնվում է պատերազմական վիճակում մեկ կամ մի քանի պետությունների կողմից զինված հարձակման պատճառով, մյուս կողմը պարտավոր է անհապաղ ռազմական օգնություն ցուցաբերել նրան՝ ՄԱԿ-ի կանոնադրության 51-րդ հոդվածին և ԿԺԴՀ-ի ու Ռուսաստանի Դաշնության օրենքներին համապատասխան»։