«Հայաստանը ցանկանում է անդամակցել ԵՄ-ին. շեղող մարտավարությո՞ւն դեպի «թուրքական աշխարհ» շարժվելու ճանապարհին»
ՔԱՂԱՔԱԿԱՆՈՒԹՅՈՒՆ
Հնարավոր է, որ «եվրոպական» տեղեկատվական և քարոզչական աժիոտաժը մի տեսակ շեղող մանևր լինի, որը նախատեսված է ներքին լսարանի համար, և որը կոչված է քողարկելու Հայաստանի ներկայիս իշխանությունների իրական կուրսը` երկիրը թուրք-ադրբեջանական տնտեսական և հաղորդակցական նախագծերին ինտեգրելը, գրում է tass.ru–ն: Ավելի վաղ վարչապետ Նիկոլ Փաշինյանը չէր բացառել Կասպից ծովի արևմտյան ափերից բնական գազի մատակարարումը հանրապետություն, իսկ մարտի սկզբին «Արմենպրես»-ի կայքում հրապարակված հոդվածում խոսել էր Կոռնիձորի անցակետից դեպի թուրքական սահմանի Մարգարա անցակետ ճանապարհային բեռնափոխադրում սկսելու պատրաստակամության մասին հավաստիացնելով, որ Հայաստանը պատրաստ է երաշխավորել անվտանգությունը։
2023 թվականի հոկտեմբերին՝ «Ղարաբաղի հիմնախնդրի վերջնական լուծումից» մեկ ամիս անց, Փաշինյանը The Wall Street Journal-ին տված հարցազրույցում ասել էր, որ պատմական համատեքստում ինքը «ոչ այնքան շեշտը դնելու է Հայաստանի, հայ ժողովրդի և Ռուսաստանի հարաբերությունների, այլ Հայաստանի և Թուրքիայի և տարածաշրջանի թյուրքալեզու ժողովուրդների միջև հարաբերությունների վրա, ավելի կոնկրետ Հայաստանի և Ադրբեջանի ու Թուրքիայի հետ հարաբերությունների վրա, և հենց այդտեղ են բոլոր հարցերը և այդ հարցերի պատասխանները»։
Քարտեզին մի հայացք գցելը բավական է տեսնելու համար, որ Հայաստանից դեպի Եվրոպա ամենակարճ ճանապարհը անցնում է Թուրքիայով, որի հետ սահմանը փակ է 1993 թվականից: Այնուամենայնիվ, Մարգարայի անցակետը վերջերս ամբողջությամբ վերանորոգվեց և նույնիսկ կարճ ժամանակով բացվեց՝ Սիրիա մարդասիրական օգնություն ուղարկելու համար, ինչն արագորեն ողջունվեց Բրյուսելում: «Բարի կամքի այդ ժեստը ոչ միայն օգնում է Սիրիայի կարիքավորներին, այլ նաև ցույց է տալիս երկկողմ երկխոսության արժեքը և նպաստում է Հայաստանի և Թուրքիայի միջև հարաբերությունների լիարժեք կարգավորմանն ուղղված ջանքերին», - հայտարարել էր ԵՄ–ի արտաքին գործերի և անվտանգության քաղաքականության պաշտոնական ներկայացուցիչ Անիտա Հիպերը։ Ավելի վաղ՝ մարտի առաջին կեսին, Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Մագդալենա Գրոնոն էր այցելել Անկարա քննարկելու Կովկասում առկա խնդիրները։ Որպես սահմանի ապաշրջափակման պայման Անկարան մատնանշում է հայ-ադրբեջանական հարաբերությունների կարգավորումը, այդ թվում Բաքվի և Երևանի միջև խաղաղության պայմանագրի ստորագրումը։ Միևնույն ժամանակ, նախագահ Ռեջեփ Էրդողանը վերջին շրջանում ակտիվորեն է խոսում եվրոպական անվտանգության հարցերի շուրջ հետաքրքրություն հայտնելով ուկրաինական ուղղությամբ «կամավորների կոալիցիայի» ձևավորման պաշտպանական նախաձեռնության նկատմամբ։
Նյութը հրապարակման պատրաստեց Կամո Խաչիկյանը
