Փաշինյանի վախը Հանրապետական կուսակցությունից է

Հայաստանի վարչապետի պաշտոնը զբաղեցնող Նիկոլ Փաշինյանը վերջին շրջանում բավական նյարդային վիճակում է, տեղեկություններ ունի, որ երկրորդ և երրորդ նախագահների թիմերի միջև «փոխհրաձգությունը» ավելի շատ վնաս հենց իրեն է տալու։ Ըստ էության, եթե երկրորդ նախագահի կողմնակիցներն ավելի շուտ կողմնակից են հերթական խորհրդարանական ընտրություններին, ապա հանրապետականները ցանկանում են խլել նախաձեռնությունն ու արտահերթ գործընթացների տանել։ Այդկերպ նաև ազդակներ հղելով, որ ճիշտն իրենց, այլ ոչ Ռոբերտ Քոչարյանի վրա խաղադրույք անելն է։ Դրանով է պայմանավորված, որ հընթացս քննարկվում է, թե ով ինչ ռեսուրս ունի, ինչի է ընդունակ։

Ըստ էության, թե՛ Փաշինյանը, թե՛ հանրապետականները հասկանում են, որ երկրորդ նախագահն առանձնապես մեծ ռեսուրսների չի տիրապետում, եթե նրա տակից հանեն, օրինակ, ՀՅԴ-ին։ Չի բացառվում, որ հանրապետականներն արդեն գարնանը փողոցային լայն պայքար սկսեն, նաև կարգավորեն հարաբերությունները Ռուսաստանի հետ։ Այդպիսի ուղիղ մեսիջներ Մոսկվային հղում են ամենառուսամետ հանրապետական գործիչ համարվող Էդուարդ Շարմազանովի միջոցով։ Վերջինս իր հարցազրույցներում անընդհատ շեշտում է, որ պետք է վերականգնել հարաբերությունները ՌԴ հետ, նաև Հայաստան-Ռուսաստան-Իրան առանցք ստեղծել՝ փաստացի ազդակներ հղելով նաև Թեհրանին։

ՀՀԿ-ականի այս ակտիվությունը խիստ մտահոգել է Նիկոլ Փաշինյանին, գիտակցում է, որ ՀՀԿ-ն թե ռեսուրսներ ունի, թե կուռ կառույց, նաև լայն կապեր գործող իշխանության կազմում։ Շատերը, այդ թվում՝ ուժային կառույցներում, որոնք իշխանափոխությունից հետո սկսել են աշխատել Փաշինյանի թիմի հետ, դեռ պահպանում են իրենց կապերը նախկինների հետ։

Շուշան Էլբակյան