Իրանը մինչև վերջ կտանի Ռաիսիի ուղղաթիռի վերաբերյալ հետաքննությունը. ՌԴ-ում Իրանի դեսպան

Ավիաաղետի հետևանքով Իրանի նախագահ Էբրահիմ Ռաիսիի, արտաքին գործերի նախարար Հոսեյն Ամիր Աբդոլլահիանի և այլ պաշտոնյաների մահվան հետաքննությունը կտարվի մինչև վերջ, Սոլովյով.LIVE-ի եթերում հայտարարել է Ռուսաստանում Իրանի դեսպան Քազեմ Ջալալին։

«Մեր բոլոր ղեկավարներն իրենց ջանքերը կենտրոնացրել են հուղարկավորության արարողությունն իրականացնելու համար, բնականաբար մենք ավարտին կհասցնենք հետաքննությունը: Անկասկած, Իրանի Իսլամական Հանրապետությունը և համապատասխան նախարարություններն ու իշխանությունները հետաքննություն են սկսել, և, իհարկե, նրանք կունենան հստակ զեկույց, և այս զեկույցը կհանձնվի Գերագույն առաջնորդին, ինչպես նաև Իրանի ժողովրդին»,- ասել է Ջալալին։

Իրանի դեսպանը նաև վստահեցրել է, որ Թեհրանի արտաքին քաղաքականությունը չի փոխվի։ Նրա խոսքով, այդ ոլորտը գտնվում է Գերագույն առաջնորդի իրավասության ներքո:

Մայիսի 20-ին դեսպանը հայտարարել է, որ ոչինչ չգիտի նախագահի ուղղաթիռի դեմ «ահաբեկչական հարձակման» վարկածի մասին։ 

Հիշեցնենք՝ Իրանի նախագահական ուղղաթիռը մայիսի 19-ին, կոշտ վայրէջք է կատարել Իրանի Արևելյան Ադրբեջան նահանգում, ինչի հետևանքով ուղղաթիռի անձնակազմն ու բոլոր ուղևորները, այդ թվում երկրի նախագահ Էբրահիմ Ռաիսին ու ԱԳ նախարար Հոսեյն Ամիր Աբդոլլահիանը զոհվել են։