Շենգեն վիզայի վճարը կթանկանա. տհաճ անակնկալները շարունակվում են

Այսօր հայտնի դարձավ, որ Եվրահանձնաժողովը որոշում է կայացրել կարճաժամկետ կացության Շենգենյան վիզայի (C տիպի վիզա) տրամադրման վճարի ընդհանուր բարձրացման մասին՝ 12%-ով։

Փոփոխությունն ուժի մեջ կմտնի արդեն 2024 թվականի հունիսի 11-ից։ 

Այսպիսով, եթե այսօր շենգենյան վիզա ստանալու համար ՀՀ քաղաքացիները վճարում են 35 եվրո, ապա ընդամենը մի քանի շաբաթ անց այն կարժենա 39.2 եվրո: 

Հիշեցնենք, 2014-ի հունվարի 1-ից ուժի մեջ է մտել ԵՄ-ի և ՀՀ-ի միջև Վիզաների տրամադրումը դյուրացնելու մասին համաձայնագիրը, ըստ որի՝ վիզայի վճարը նախկին 60 եվրոյից նվազեցվել էր 35 եվրոյի:

Ի դեպ, ՀՀ քաղաքացիների և հայաստանաբնակների համար շենգենյան վիզա ստանալը, արդեն երկու տարի է, իսկական մղձավանջ է դարձել, քանզի դեսպանատներն օր գրեթե չեն տրամադրում, լավագույն դեպքում մի քանի ամսից կամ գուցե մեկ տարուց, իսկ մնացած բոլոր տարբերակները հավելյալ վճարների հետ են կապված, և ստացվում է, որ շենգենյան վիզա ստանալը, եթե այդ ճանապարհով քաղաքացին գնա, կարժենա 50,000-80,000 դրամ կամ գուցե ավելի:

Այս խնդիրը բազմաթիվ անգամներ բարձրացվել է ամենաբարձր մակարդակով՝ և՛ ԱԺ պատգամավորների, և՛ ԱԳՆ մակարդակով, սակայն սայլը տեղից չի շարժվում, և քաղաքացիները շարունակում են զանազան ելքեր փնտրել վիզա ստանալու համար:

Մարիաննա Արամյան