Ուկրաինայի հետախուզությունը հերքում է Կիևի մասնակցությունը «Կրոկուսում» տեղի ունեցած ահաբեկչությանը

Ուկրաինայի ՊՆ գլխավոր հետախուզական վարչությունը հերքում է Մոսկվայի մարզի «Կրոկուս Սիթի Հոլ» համերգասրահում տեղի ունեցած ահաբեկչությանը մասնակցության մասին` Ռուսաստանի մեղադրանքները, հայտնում է RBC-Ukraine-ն։

«Կոնկրետ այս հայտարարությունն ու այս տեղեկությունն, իհարկե, անհեթեթություն են։ ԱԴԾ-ի այս հայտարարությունները նախատեսված են կա՛մ բացահայտ անգրագետների, կա՛մ զոմբիացված ռուս բնակչության համար։ Պատկերացնել, որ ավելի քան երկու տարվա լայնածավալ ներխուժումից հետո ահաբեկիչները շարժվում են դեպի սահմանամերձ շրջաններ, որոնք այժմ ամենահագեցված են անվտանգության ուժերով, հատուկ ծառայություններով և հենց զինվորականներով, կարծում եմ, որ այստեղ մեկնաբանություններն ավելորդ են»,- ասաց Պաշտպանության նախարարության հետախուզության գլխավոր վարչության ներկայացուցիչ Անդրեյ Յուսովը։

Նրա խոսքով, ԱԴԾ-ի մեղադրանքը «սուտ է և ռուսական ռեժիմի կողմից ուկրաինական հետքը գրավելու փորձ, ինչը նրանք իրականում անում էին այս ահաբեկչության առաջին րոպեներից»։

Ավելի վաղ, Ռուսաստանի անվտանգության ուժերը, այդ թվում՝ Քննչական կոմիտեն և ԱԴԾ-ն, հայտնել էին Ուկրաինայի հետ սահմանի մոտ «Կրոկուս»-ում տեղի ունեցած ահաբեկչության մեջ կասկածվողների ձերբակալության մասին։

Ավելի ուշ, ռուսաստանցիներին ուղղված ուղերձի ժամանակ երկրի նախագահ Վլադիմիր Պուտինը հայտարարել է, որ Մոսկվայի շրջանի «Կրոկուս Սիթի Հոլ» համերգասրահում հրաձգություն իրականացրած ահաբեկիչների համար «պատուհան» է պատրաստվել՝ փախչելու Ուկրաինա։