Պատերազմի ժամանակ հեռացած ուկրաինացիները պետք է մտածեն վերադառնալու և երկիրը պաշտպանելու մասին. Ուկրաինայի ԱԳ ղեկավար

Ուկրաինայի արտաքին գործերի նախարար Դմիտրի Կուլեբան կոչ է արել ուկրաինացիներին, որոնք լքել են երկիրը պատերազմից հետո, վերադառնալ և օգնել պաշտպանել իրենց հայրենիքը։

Այս մասին նա ասել է The Irish Times-ին տված հարցազրույցում։

Արտգործնախարարը շնորհակալություն է հայտնել Իռլանդիային, որը ռուսական ներխուժման սկզբից ի վեր ապաստան է տվել ավելի քան 100 հազար ուկրաինացու և տասնյակ միլիոնավոր եվրոյի մարդասիրական օգնություն տրամադրել։

«Մենք հարգում ենք յուրաքանչյուր մարդու անհատական ընտրությունը, բայց նաև կոչ ենք անում բոլոր ուկրաինացիներին, որոնք լքել են երկիրը լայնամասշտաբ ներխուժման սկզբից ի վեր, մտածել տուն վերադառնալու մասին», - ավելացրել է Կուլեբան:

«Մենք հասկանում ենք, որ որոշ մարդիկ կարող են չունենալ այս ընտրության հնարավորությունը առողջության կամ այլ անձնական հանգամանքների պատճառով: Բայց նրանց, ովքեր ընտրություն ունեն, մենք կոչ ենք անում վերադառնալ և օգնել Ուկրաինային պայքարել և գոյատևել իրենց անմիջական անձնական ներդրման միջոցով», - ասել է նա:

Մոտավոր հաշվարկներով վեց միլիոն մարդ լքել է Ուկրաինան ռուսական ներխուժման սկզբից ի վեր, մեծ մասը մեկնել է Եվրամիություն: