Bloomberg-ը բացատրել է Եվրոպայում գազի գնի անկումը ցուրտ եղանակի ֆոնին

Եվրոպայում գազի գները նվազել են 60%-ով 2023թ.-ին և ևս 12%-ով իջել 2024թ.՝ չնայած Հութիների հարձակումների հետևանքով առևտրային ուղիների փոփոխություններին և ցուրտ եղանակի հետևանքով առաջացած պահանջարկի աճին: Ինչպես նշում է Bloomberg-ը, դա տեղի է ունեցել վերականգնվող էներգիայի շնորհիվ։

Եվրոպայում հողմային տուրբինների և արևային կայանների թվի ավելացումը նպաստել է գազի պահանջարկի կրճատմանը, ինչպես նաև օգնել է Ֆրանսիայում ատոմային էներգիայի արտադրության վերականգնումը: Արդյունքում վառելիքի նշանակությունը Եվրոպայի էներգետիկ հաշվեկշռում ընկել է։

«Սա արդեն երկրորդ ձմեռն է, որ Եվրոպան անցկացնում է առանց ռուսական գազի։ Այն փաստը, որ այժմ կա մի նախադեպ՝ 2022-2023 թվականների ձմեռը, որն անցավ առանց որևէ խնդիրների, օգնում է հանգստացնել նյարդերը», - ասում է HSBC Holdings-ի նավթի և գազի եվրոպական հետազոտությունների ղեկավար Կիմ Ֆուստիեն:

Հունվարի 17-ին Եվրոպայում գազի գները իջել են մինչև վերջին հինգ ամսվա ամենացածր մակարդակը՝ հասնելով մինչև 28,23 եվրո կամ 322,14 դոլար 1 հազար խորանարդ մետրի դիմաց։ 

Միևնույն ժամանակ, առջևում շատ խնդիրներ կան, հիշում է Bloomberg-ը։ Այս տարեվերջին լրանում է Ռուսաստան-Ուկրաինա գազի տարանցման պայմանագրի ժամկետը, ինչը կարող է հանգեցնել Ռուսաստանից մատակարարումների էլ ավելի նվազմանը։ Այնուամենայնիվ, չնայած հեղուկ բնական գազի (LNG) հսկայական ներդրումներին, նոր հզորությունների մեծ մասը շուկայում չի հայտնվի մինչև 2025 և 2026 թվականները: Բացի այդ, ավելի ու ավելի են գրանցվում աննորմալ եղանակային իրադարձություններ, ինչը ծանրաբեռնում է էներգետիկ համակարգը, երբեմն էլ մեծացնում է գազի պահանջարկը։