ԵՄ-ն չի համաձայնել Ուկրաինային զենքով օգնելու համար 500 միլիոն եվրո հատկացնել. Բորել
ՄԻՋԱԶԳԱՅԻՆ
Եվրամիության բարձրաստիճան դիվանագետ Ժոզեպ Բորելը երկուշաբթի օրը ԵՄ արտաքին գործերի նախարարների հանդիպման արդյունքներով հաստատել է Ուկրաինային զենքով օգնելու համար 500 միլիոն եվրոյի տրանշի հատկացման մասին որոշման բացակայությունը։ Այս մասին Բորելը հայտարարել է Լյուքսեմբուրգում կայացած մամուլի ասուլիսում, փոխանցում է Европейская правда»-ն։
Նա ասել է, որ արտաքին քաղաքականության գերատեսչությունների ղեկավարները քննարկել են, թե ինչպես բավարարել «Ուկրաինայի ամենահրատապ կարիքները, նրա պաշտպանական կարիքները»։
«Մեզ դեռ չի հաջողվել լուծել Խաղաղության եվրոպական հիմնադրամի ութերորդ և վերջին տրանշի խնդիրը։ Մենք դեռ լուծում ենք փնտրում, բայց այսպես թե այնպես կգտնենք»,- ասաց նա։
Լրատվամիջոցները հայտնել են, որ որոշումն արգելափակել է Հունգարիան։
Բորելը հավելել է, որ նախարարները նաև քննարկել են բազմամիլիարդանոց առանձին ծրագրի հաստատումը, որը ֆինանսավորում է Ուկրաինային ռազմական օգնությունը Եվրոպական խաղաղության հիմնադրամի շրջանակներում, սակայն սպասում են Եվրոպական խորհրդի կողմից քաղաքականության ուղեցույցին, որը կհանդիպի այս շաբաթ:
