Բայդենը ծրագրում է 100 միլիարդ դոլարի ռազմական օգնություն խնդրել Իսրայելի և Ուկրաինայի համար
ՄԻՋԱԶԳԱՅԻՆ
ԱՄՆ նախագահ Ջո Բայդենը ծրագրում է մոտ 100 միլիարդ դոլարի լրացուցիչ օգնության հարցում ներկայացնել, որը կներառի ռազմական օգնություն Ուկրաինային և Իսրայելին, հայտնում է Bloomberg-ը՝ հղում անելով աղբյուրներին։
Աջակցությունը կներառի նաև սահմանների անվտանգության ֆինանսավորում և օգնություն հնդխաղաղօվկիանոսյան տարածաշրջանի երկրներին, այդ թվում՝ Թայվանին:
Նախագահ Բայդենը խոստացել է աջակցել Իսրայելին այս ամսվա սկզբին ՀԱՄԱՍ-ի հարձակումից հետո: Թեև Իսրայելին օգնությունը սովորաբար անցնում է Կոնգրեսում երկկուսակցական աջակցությամբ, հանրապետական օրենսդիրները դեմ են քվեարկել վերջին ամիսներին Ուկրաինային հատկացվող նշանակալի օգնությանը:
Հայցվող օգնության փաթեթի մանրամասները դեռ մշակվում են, Bloomberg-ին հայտնել է աղբյուրը։ Բացի այդ, համաձայնեցված գումարը ծածկելու է ամբողջ ֆինանսական տարին։ Սպիտակ տան նախկին խնդրանքը, որով Ուկրաինային 24 միլիարդ դոլարի օգնություն էր պահանջվում, վերաբերում էր ընդամենը երեք ամիս ժամկետի:
Սենատի մեծամասնության առաջնորդ Չակ Շումերն այսօր ավելի վաղ ասել էր, որ փաթեթը կներառի ռազմական, դիվանագիտական, հետախուզական և հումանիտար օգնություն Իսրայելին, և նա ակնկալում է, որ Սպիտակ տունը այդ հարցումը կներկայացնի «մինչև այս շաբաթվա վերջ»:
