Մեծ Բրիտանիայի վարչապետը դեմ է Ուկրաինային կասետային զինամթերքներ տրամադրելուն

Մեծ Բրիտանիայի վարչապետ Ռիշի Սունակը հասկանալ է տվել, որ Մեծ Բրիտանիան «հավանություն չի տալիս» կասետային զինամթերքների օգտագործմանն այն բանից հետո, երբ ԱՄՆ նախագահ Ջո Բայդենը համաձայնել է այդ ռումբերն ուղարկել Ուկրաինա, տեղեկացրել է PA Media-ն։

Սունակը շաբաթ օրն ընդգծել է, որ Մեծ Բրիտանիան 123 երկրներից մեկն է, որը ստորագրել է դրանց օգտագործումն արգելող կոնվենցիան։

Սունակն ասել է, որ Մեծ Բրիտանիան դրա փոխարեն Կիեւին տրամադրում է տանկեր եւ հեռահար գործողության զենք։

«Մեծ Բրիտանիան ստորագրել է կասետային զինամթերքների արտադրությունը կամ օգտագործումն արգելող կոնվենցիան»,- ասել է նա լրագրողներին։

«Մենք կշարունակենք մեր ավանդը ներդնել Ուկրաինայի աջակցության գործում, բայց մենք արդեն արել ենք դա՝ ծանր մարտական տեխնիկա եւ հեռահար գործողության զենք տրամադրելով եւ, հույս ունեմ, բոլոր երկրները կկարողանան շարունակել աջակցել Ուկրաինային»,- ավելացրել է Բրիտանիայի վարչապետը