ԵԱՀԿ Խորհրդարանական վեհաժողովը «Վագներ» ՄՌԿ-ն ահաբեկչական կազմակերպություն է ճանաչել

Եվրոպայում անվտանգության եւ համագործակցության կազմակերպության (ԵԱՀԿ) Խորհրդարանական վեհաժողովի Վանկուվերում կայացած նիստի վերջնական փաստաթղթում, որը հրապարակվել է երեքշաբթի՝ հուլիսի 4-ին, նշվել է, որ «Վագներ» մասնավոր ռազմական ընկերության գործողությունները Ռուսաստանի կառավարության անունից կարող են «արդարացիորեն բնութագրվել որպես ահաբեկչական»։

Նշվել է նաեւ, որ ԵԱՀԿ անդամ պետությունները պետք է միջոցներ ձեռնարկեն «Վագներ» խմբի եւ նրա հետ զուգորդվող կամ դրա հիման վրա ստեղծվող կառույցների դեմ, մասնավորապես՝ դրանք ահաբեկչական կազմակերպություններ անվանելով։

Հռչակագիրը նաեւ «անդամ պետություններին կոչ է անում ամրապնդել միջազգային նորմերը, որոնք հստակ ճանաչում են «Վագներ» խմբի եւ նրա գործողությունների ահաբեկչական բնույթը եւ «Ռուսաստանի՝ որպես այդ ահաբեկչական կազմակերպության հովանավորի պատասխանատվությունը»։

Առաջին միջազգային կազմակերպությունը, որը Ռուսաստանը ճանաչել է ահաբեկչական պետություն, Եվրոպայի խորհրդի Խորհրդարանական վեհաժողովն է, որը համապատասխան բանաձեւն ընդունել է 2022թ. հոկտեմբերին։

ԵԱՀԿ-ն ներկայում անվտանգության միակ եվրոպական կազմակերպությունն է, որի անդամներն են հանդիսանում Ռուսաստանը, ԱՄՆ-ն եւ Ուկրաինան։

ԵԱՀԿ (որի կազմում 57 պետություն կա) հիմնական խնդիրը հակամարտությունների կանխումն է, խաղաղության մոնիթորինգը եւ ընտրություններին հետեւելը։