Ռուսաստանում բարձրաստիճան պաշտոնյաներին արգելել են ազատվել աշխատանքից

Ռուս բարձրաստիճան պաշտոնյաներին արգելվել է հեռանալ պաշտոններից Ուկրաինայի դեմ Ռուսաստանի պատերազմի ֆոնին։ Այս մասին երկուշաբթի՝ մայիսի 15-ին գրել է «Важные истории» ինտերնետ-պարբերականը՝ հղում կատարելով Անվտանգության դաշնային ծառայության նախկին աշխատակցին, քաղտեխնոլոգ, որն աշխատել է ռուս նահանգապետերից մեկի հետ, ինչպես նաեւ երկու մարդու, որոնք ՌԴ նախագահի աշխատակազմի բարձրաստիճան պաշտոնյաների մերձավոր շրջապատից են։

Առնվազն երկու նահանգապետ փորձել է ազատվել աշխատանքից, բայց պետության ղեկավարի աշխատակազմում նրանց «ոչ թե պարզապես արգելել են, այլ ակնարկել են քրեական գործերի մասին», ընդգծել է ԱԴԾ նախկին աշխատակիցը։ Նա չի նշել, թե որ նահանգապետերի մասին է խոսքը։

Հարեւան երկիր ՌԴ ռազմական ներխուժումից հետո ռուս շատ պաշտոնյաներ են ցանկացել ազատվել աշխատանքից, նշել է զրուցակիցը։ Սակայն Կրեմլում նման ցանկությունը «գնահատում են որպես դավաճանություն, ուստի պետծառայողների առջեւ խնդիր է դրվել «միասնություն ցուցաբերել», նշել է «Важные истории»-ն։ Արգելքը կրում է ոչ պաշտոնական բնույթ, ուստի որոշ պաշտոնյաների կարող են թույլ տալ ազատվել առողջական խնդիրների կամ կոռուպցիայի պատճառով, ավելացրել է պարբերականը։