ԱՄՆ-ն դիտարկում է «Կասպերսկու լաբորատորիայի» դեմ սահմանափակումներ մտցնելու հնարավորությունը

ԱՄՆ առեւտրի նախարարությունը դիտարկում է կիբեռանվտանգության «Կասպերսկու լաբորատորիա» ռուսական ընկերության դեմ սահմանափակումներ մտցնելու հնարավորությունը, գրել է The Wall Street Journal-ը՝ հղում կատարելով  իրազեկ աղբյուրներին։

ԱՄՆ նախագահ Ջո Բայդենի վարչակազմը դիտարկում է ընկերության դեմ սահմանափակումներ մտցնելու հնարավորությունը՝ իր օնլայն-անվտանգության կանոններին համապատասխան, նշվել է հաշվետվությունում։

Վարչակազմն անցած տարի ուժեղացրել է «Կասպերսկու լաբորատորիայի» հակավիրուսային ծրագրային ապահովման ստուգումը ազգային անվտանգության ոլորտում, «քանի որ մտահոգություններ կան ռուսական կիբեռգրոհների հետ կապված՝ Ուկրաինա Մոսկվայի ներխուժումից հետո»։

ԱՄՆ-ի կարգավորող մարմիններն արդեն դաշնային կառավարությանն արգելել են օգտագործել Kaspersky ծրագրային ապահովումը։

ԱՄՆ առեւտրի նախարարության  արդյունաբերության եւ անվտանգության գրասենյակը հայտարարել է, որ չի մեկնաբանում կոնկրետ ընկերության որեւէ պոտենցիալ գործողություն։

Կասպերսկու դեմ հարկադրական միջոցների մասին տեղեկությունը հաջորդել է ԱՄՆ-ի նոր օրենսդրության ընդունմանը, որը թույլ է տալիս Սպիտակ տանն արգելել չինական TikTok-ը կամ օտարերկրյա այլ տեխնոլոգիաներ, եթե դրանք սպառնալիք են ներկայացնում ազգային անվտանգությանը։